ভয়াৱহ বায়ু প্ৰদূষণে কেৱল ৰাজধানী নতুন দিল্লীয়ে নহয় ভাৰতৰ চুবুৰীয়া ৰাষ্ট্ৰ পাকিস্তানটো ভয়ংকৰ ৰূপ ধাৰণ কৰিছে। পাকিস্তানৰ পঞ্জাৱ প্ৰদেশত বায়ু প্ৰদূষণৰ সংকটে ভয়াৱহ স্তৰত উপনীত হৈছে। লাহোৰ আৰু মুলতানৰ দৰে ডাঙৰ চহৰৰ বায়ুৰ গুণাগুণ সূচকাংক (AQI) য়ে ২০০০ অতিক্ৰম কৰি বিশ্বৰ আটাইতকৈ প্ৰদূষিত অঞ্চলৰ ভিতৰত স্থান লাভ কৰিছে। এই পৰিস্থিতিৰ বাবে চৰকাৰে লকডাউন আৰু অন্যান্য নিষেধাজ্ঞাকে ধৰি কঠোৰ ব্যৱস্থা গ্ৰহণ কৰিবলৈ বাধ্য হৈছে।
পাকিস্তানত বায়ু প্ৰদূষণে বিপজ্জনক মাত্ৰাত উপনীত হৈছে। এইয়া অতি বিপজ্জনক আৰু ই মানুহ আৰু জীৱ-জন্তুৰ স্বাস্থ্যৰ বাবে গুৰুতৰ বিপদৰ সৃষ্টি কৰে। এই কথাটোৰ পৰা অনুমান কৰিব পাৰি যে যোৱা এসপ্তাহত পাকিস্তানত ৬ লাখৰো অধিক লোক শ্বাস-প্ৰশ্বাসজনিত ৰোগত আক্ৰান্ত হৈছিল। ৬৫ হাজাৰৰো অধিক লোকক চিকিৎসালয়ত ভৰ্তি হ’বলগীয়া হৈছিল। এই সময়ছোৱাত চিকিৎসালয়ত শুকান কাহ, নিউমনিয়া, বুকুৰ সংক্ৰমণ, উশাহ-নিশাহৰ কষ্টৰ ঘটনা দ্ৰুতগতিত বৃদ্ধি পাইছে।
পাকিস্তানৰ লাহোৰৰ মেয়’ হাস্পতালত প্ৰদূষণত আক্ৰান্ত ৪ হাজাৰৰো অধিক ৰোগীৰ চিকিৎসা কৰাৰ বিপৰীতে জিন্না হাস্পতালে ৩৫০০ ৰোগীক চিকিৎসা প্ৰদান কৰে। এই অভাৱনীয় পৰিস্থিতিৰ বাবেই অ’পিডিৰ কৰ্ম কৰ্তব্য নিশা ৮ বজালৈ বৃদ্ধি কৰা হৈছে। বাতিল কৰা হৈছে পেৰামেডিকেল কৰ্মচাৰীৰ ছুটী।
এনে পৰিস্থিতিত শুকুৰবাৰ, শনিবাৰ আৰু দেওবাৰে লাহোৰ আৰু মুলতানত সম্পূৰ্ণ লকডাউন কাৰ্যকৰী কৰাৰ কথা ঘোষণা কৰিছে চৰকাৰে।
কিন্তু AQIৰ পৰিস্থিতি বেয়া হৈ থাকিলে লকডাউনৰ সময়সীমা বৃদ্ধি কৰা হ’ব পাৰে বুলিও কোৱা হৈছে। লকডাউনৰ বাবে বন্ধ হৈ পৰিছে বিবাহ হল আৰু ৰেষ্টুৰেণ্ট। সাময়িকভাৱে বন্ধ হৈ আছে বিদ্যালয়-মহাবিদ্যালয়। ব্যক্তিগত কাৰ্যালয়সমূহক ৫০ শতাংশ কাম কৰিবলৈ দিয়া হৈছিল আৰু প্ৰদূষণৰ নীতি-নিয়ম উলংঘা কৰাসকলৰ বিৰুদ্ধে কঠোৰ ব্যৱস্থা গ্ৰহণ কৰা হৈছে।
