বিহাৰৰ পাটনা জিলাৰ বিহটা অঞ্চলত সংঘটিত হৈছে এক ভয়ংকৰ পথ দুৰ্ঘটনা। এখন অটো আৰু ট্ৰাকৰ মাজত সংঘটিত হোৱা সংঘৰ্ষত চাৰিগৰাকী স্কুলীয়া শিক্ষাৰ্থীৰ মৃত্যু হৈছে। মৃত আটাইকেইটি শিশু অটোখনেৰে বিদ্যালয়ৰ পৰা ঘৰলৈ উভতি আহি আছিল।
আৰক্ষীয়ে জনোৱা অনুসৰি, একেখন স্কুলতে পঢ়া চাৰিটা শিশুৱে বিদ্যালয় ছুটি হোৱাৰ পিছত এখন অটোৰে কনহোলী গাঁৱলৈ আহি থকা সময়ত বিহটাৰ বিশনপুৰ বাগিচাৰ সমীপত বিপৰীত দিশৰ পৰা আহি থকা এখন তীব্ৰবেগী ট্ৰাকে অটোখনক খুন্দিয়াই।
এই সংঘৰ্ষটো ইমানেই জোৰদাৰ আছিল যে অটোখন চূৰ্ণ বিচূৰ্ণ হৈ যায়। দুৰ্ঘটনাটোত চাৰিওটি শিশুৰে ঘটনাস্থলত মৃত্যু হয়। এই ঘটনাত ৬টি শিশু গুৰুতৰভাৱে আহত হয়। আহত আটাইকেইটি শিশুকে হাস্পতালত ভৰ্তি কৰোৱা হৈছে।
ইফালে এই ঘটনা সংঘটিত হোৱাৰ পিছতে উত্তেজিত ৰাইজে পথ অৱৰোধ কৰি তীব্ৰ প্ৰতিবাদ সাব্যস্ত কৰে। প্ৰতিবাদী ৰাইজে দুৰ্ঘটনা সংঘটিত কৰা ট্ৰাকখন ভাঙি লণ্ড ভণ্ড কৰি জুই লগাই দিয়ে।
পৰিস্থিতি অধিক উত্তপ্ত হৈ পৰাত ঘটনাস্থলত আৰক্ষী উপস্থিত হৈ পৰিস্থিতি নিয়ন্ত্ৰণ কৰি মৃতদেহ কেইটা নিজৰ জিম্মাত লৈ মৰণোত্তৰ পৰীক্ষাৰ বাবে প্ৰেৰণ কৰে।
