বৃহস্পতিবাৰে নাগৰিক আৰু বিশেষজ্ঞৰ এটা প্ৰতিনিধি দলে লোকসভাৰ বিৰোধী দলপতি ৰাহুল গান্ধীক সাক্ষাৎ কৰে। সংসদ ভৱন কমপ্লেক্সত অনুষ্ঠিত বৈঠকৰ সময়ত ৰাহুল গান্ধীয়ে বায়ু প্ৰদূষণৰ বিষয়টো সংসদত উত্থাপন কৰিব বুলি আশ্বাস দিয়ে।
প্ৰতিনিধি দলটোৱে বায়ু প্ৰদূষণক জনস্বাস্থ্য আৰু কল্যাণৰ প্ৰতি ভয়াৱহ ভাবুকি বুলি অভিহিত কৰে। সংকট দূৰ কৰাৰ বাবেও তেওঁ কাৰ্য্যকৰী সমাধানৰ পৰামৰ্শ আগবঢ়ায়। ৰাহুল গান্ধীয়ে তেওঁলোকক আশ্বাস দিয়ে যে, তেওঁ এই বিষয়টো সংসদত প্ৰশ্ন উত্থাপন কৰিব আৰু তেওঁলোকৰ দাবীৰ ওপৰতো শীঘ্ৰে ব্যৱস্থা গ্ৰহণৰ দাবী জনাব। তেওঁ কয় যে, এই বিষয়ত সংসদে নিৰ্ণায়কভাৱে কাম কৰিব আৰু মানুহৰ স্বাস্থ্য আৰু পৰিৱেশ সুৰক্ষাৰ ব্যৱস্থাক অগ্ৰাধিকাৰ দিব বুলি আশা কৰা হৈছে।
ইয়াৰ পূৰ্বে ৰাহুল গান্ধীয়ে উত্তৰ ভাৰতৰ বায়ু প্ৰদূষণক ৰাষ্ট্ৰীয় জৰুৰীকালীন অৱস্থা বুলি অভিহিত কৰিছিল। লগতে তেওঁ সতীৰ্থ সাংসদসকলক আগন্তুক সংসদ অধিৱেশনত দেশ কেনেকৈ চিৰদিনৰ বাবে এই সংকটৰ পৰা ওলাই আহিব পাৰে এই বিষয়টো আলোচনা কৰিবলৈ আহ্বান জনায়।
তেওঁ কয় যে বায়ু প্ৰদূষণৰ সংকটৰ বাবে ৰাজনৈতিক দোষৰ প্ৰয়োজন নহয় বৰঞ্চ সামূহিক ৰাষ্ট্ৰীয় সঁহাৰিৰ প্ৰয়োজন। ৰাহুল গান্ধীয়ে এক্সত এটা ভিডিঅ’ শ্বেয়াৰ কৰিছিল। ইয়াত তেওঁ ইণ্ডিয়া গেটত পৰিৱেশবিদ বিমলেন্দু ঝাৰ সৈতে বায়ু প্ৰদূষণৰ বিষয়টো আলোচনা কৰা দেখা গৈছিল। ভিডিঅ’টোৰ লগতে তেওঁৰ পোষ্টটোত কংগ্ৰেছ নেতাগৰাকীয়ে কৈছিল যে, এয়া জনস্বাস্থ্য সংকট, যিয়ে আমাৰ ভৱিষ্যত প্ৰজন্মক অন্ধকাৰৰ দিশে আগবঢ়াই লৈ গৈছে লগতে সকলোৰে জীৱন শ্বাসৰুদ্ধ কৰি তুলিছে।
ইয়াৰ উপৰিও ই এক পৰিৱেশ আৰু অৰ্থনৈতিক দুৰ্যোগ, যিয়ে অগণন জীৱন ধ্বংস কৰি আছে। বিশুদ্ধ বতাহৰ বাবে দেশৰ জনতাই হাহাকাৰ কৰিছে, শিশুসকল অসুস্থ হৈ পৰিছে আৰু লাখ লাখ লোকে প্ৰাণ হেৰুৱাইছে। পৰ্যটন হ্ৰাস পাইছে লগতে বিশ্বব্যাপী সুনাম ক্ষতিগ্ৰস্ত হৈছে।
