উত্তৰ প্ৰদেশৰ প্ৰয়াগৰাজৰ ত্ৰিবেণী সংগমত চলি আছে মহাকুম্ভ। সনাতনী ধৰ্মৰ এই পৱিত্ৰ উৎসৱত অংশগ্ৰহণ কৰিবলৈ প্ৰয়াগৰাজৰ সংগমস্থলীত উপস্থিত হৈছে লাখ লাখ ভক্ত।
বিদেশী অতিথিকো আমন্ত্ৰণ কৰা হৈছে এই মেলালৈ। বৃহস্পতিবাৰে মহাকুম্ভৰ চতুৰ্থ দিনটোত ১০খন দেশৰ পৰা অহা বিদেশী অতিথিৰ ২১ জনীয়া এটা দল ভাৰতত উপস্থিত হয়। তেওঁলোকে এই মহাকুম্ভ মেলা পৰিদৰ্শন কৰে। এই পৱিত্ৰ অনুষ্ঠানৰ কাৰুকাৰ্য দেখি সকলো অভিভূত হৈ পৰিছে। ইফালে বিদেশী অতিথিৰ দলত অন্তৰ্ভুক্ত ইউ এ ইৰ মুছলমান মহিলা এগৰাকীয়ে মহাকুম্ভ মেলাৰ আয়োজন দেখি আৱেগিক হৈ পৰে।
মহাকুম্ভ ভ্ৰমণ কৰা বিদেশ প্ৰতিনিধি দলৰ একমাত্ৰ মুছলমান মহিলা চেলি এল আজাব। তেওঁ সংযুক্ত আৰব আমিৰশ্বাহীৰ পৰা আহিছে। মহাকুম্ভ মেলাৰ আয়োজন দেখি তেওঁ আচৰিত হয়। এই অনুষ্ঠানক তেওঁ বিশ্বৰ একতাৰ বাৰ্তা বুলি অভিহিত কৰে।
সংবাদ মাধ্যমৰ সন্মুখত তেওঁ মধ্যপ্ৰাচ্যৰ পৰা ভাৰতলৈ অহা বুলি জনায়। মহাকুম্ভৰ সন্দৰ্ভত তেওঁ কয় যে, এয়া এক সুন্দৰ আশ্চৰ্যকৰ অনুষ্ঠান। এইখন পৃথিৱীৰ আটাইতকৈ ডাঙৰ ধৰ্মীয় সমাৱেশ।
চেলি এল আজাবে মহাকুম্ভ আৰু ভাৰতীয় সংস্কৃতিৰ ধৰ্মীয় তাৎপৰ্য্য বুজিবলৈ চেষ্টা কৰে। মহাকুম্ভৰ আয়োজন কৰাৰ বাবে তেওঁ যোগী চৰকাৰক প্ৰশংসা কৰে। মহাকুম্ভক অতি সফলভাৱে আয়োজন কৰা হৈছে বুলিও তেওঁ কয়। কোটি কোটি লোকৰ নিৰাপত্তাৰ বাবে অসংখ্য আৰক্ষী বিষয়া উপস্থিত থাকে। এনেকুৱা এখন ডাঙৰ অনুষ্ঠানে ভাৰতত অনৈক্যৰ মাজত ঐক্যৰ বাৰ্তা দিয়ে।
ইউ এ ইৰ চেলি এল আজাবৰ লগতে দলটোত ফিজি, ফিনলেণ্ড, গায়ানা, মালয়েছিয়া, মৰিচাছ, ছিংগাপুৰ, দক্ষিণ আফ্ৰিকা, শ্ৰীলংকা, ট্ৰিনিদাদ আৰু ট’বাগোৰ ২১ জনকৈ প্ৰতিনিধি ভাৰতলৈ আহে। ইফালে বিদেশী প্ৰতিনিধি দলৰ অতিথিসকলে সংগমস্থলীৰ লগতে মহাকুম্ভৰ কেইবাখনো আখৰা পৰিদৰ্শন কৰে। তেওঁলোকে ঋষি-সাধুসকলক লগ পোৱাৰ লগতে মহা কুম্ভ আৰু ভাৰতীয় সংস্কৃতিৰ বিষয়ে জানিবলৈ সক্ষম হয়।
