সংবিধান আৰু গণতন্ত্ৰৰ ওপৰত বিশ্বাস অটুট ৰখাৰ বাবে দেশবাসীক ধন্যবাদ প্ৰধানমন্ত্ৰী মোদীৰ

আজি চাৰি মাহৰ দীঘলীয়া বিৰতিৰ অন্তত জনপ্ৰিয় ৰেডিঅ’ অনুষ্ঠান মন কী বাতৰ মাধ্যমেৰে দেশবাসীক সম্বোধন কৰে দেশৰ প্ৰধানমন্ত্ৰী নৰেন্দ্ৰ মোদীয়ে। উল্লেখ্য তৃতীয় বাৰৰ বাবে প্ৰধানমন্ত্ৰী হিচাপে শপত গ্ৰহণ কৰাৰ পিছত আজি প্ৰথমবাৰৰ বাবে মন কী বাত অনুষ্ঠানত অংশগ্ৰহণ কৰি নৰেন্দ্ৰ মোদীয়ে যোগ দিৱস আৰু পেৰিছ অলিম্পিককে ধৰি কেইবাটাও গুৰুত্বপূৰ্ণ প্ৰসংগ উত্থাপন কৰে। মন কী বাতৰ ১১১তম সংস্কৰণত অংশ লৈ প্ৰথমতেই সংবিধান আৰু গণতন্ত্ৰৰ ওপৰত বিশ্বাস অটুট ৰখাৰ বাবে দেশবাসীক ধন্যবাদ জনায় প্ৰধানমন্ত্ৰী গৰাকীয়ে। ৬৫ কৌটি ভোটাৰৰ অংশগ্ৰহণেৰে ২০২৪ৰ লোকসভা নিৰ্বাচনক বিশ্বৰ ভিতৰতে সৰ্ববৃহৎ নিৰ্বাচন বুলি দাবী কৰি তেওঁ কয় যে মই নিৰ্বাচনী প্ৰক্ৰিয়াটো সুকলমে পৰিচালনা কৰাৰ বাবে নিৰ্বাচন আয়োগ আৰু তাৰ লগত জড়িত সকলো ব্যক্তিকে অভিনন্দন জনাইছোঁ। ইয়াৰ লগতে বৃক্ষ ৰোপণৰ ওপৰত গুৰুত্ব আৰোপ কৰি প্ৰধানমন্ত্ৰী গৰাকীয়ে দেশৰ ধনী কিম্বা দুখীয়া সকলো স্তৰৰ জনতাক নিজৰ মাতৃৰ নামত একোডালকৈ গছপুলি ৰোপণৰ আহ্বান জনায়। তদুপৰি পেৰিছ অলিম্পিকত ভাৰতে উচ্চ মানৰ প্ৰদৰ্শন কৰিব বুলিও আশাবাদী প্ৰধানমন্ত্ৰী নৰেন্দ্ৰ মোদী। যোগ দিৱসত দেশ বিদেশৰ জনতাৰ অভূতপূৰ্ব অংশগ্ৰহণ আৰু কুৱেইটৰ ৰেডিঅ’ত হিন্দী ভাষাৰ অনুষ্ঠানৰ প্ৰচাৰক লৈ গৌৰৱান্বিত বুলি দাবী কৰি তেওঁ কয় যে ভাৰতৰ বাবে এয়া এটা শুভ লক্ষণ। প্ৰধানমন্ত্ৰী গৰাকীয়ে লগতে অৰাকু কফী আৰু জম্মু কাশ্মীৰৰ বৰফৰ বাদাম ইতিমধ্যেই বিদেশলৈ ৰপ্তানি আৰম্ভ হৈছে বুলিও ঘোষণা কৰে। অনুষ্ঠানৰ শেষত বাংগালোৰৰ এখন বিশেষ উদ্যানৰ বিষয়ে দেশবাসীক অৱগত কৰে দেশৰ প্ৰধানমন্ত্ৰী গৰাকীয়ে। বাংগালোৰৰ কব্বন উদ্যানত দেওবাৰৰ দিনটোত শিশুৰ পৰা বৃদ্ধলৈ সকলোৱে সংস্কৃত ভাষাত কথা পাতে বুলি উল্লেখ কৰি তেওঁ লগতে আজিৰ দিনটোতেই সংস্কৃত বুলেটিন প্ৰচাৰৰ ৫০ বছৰ পূৰ্ণ হোৱাৰ বাবে আকাশবাণী পৰিয়ালক শুভেচ্ছা জ্ঞাপন কৰে। এনেদৰেই দেশৰ ভিন্ন প্ৰান্তৰ ভিন্ন প্ৰসংগৰে তৃতীয়বাৰৰ বাবে প্ৰধানমন্ত্ৰী হিচাপে নিৰ্বাচিত হোৱাৰ পিছত দেশবাসীক প্ৰথমবাৰৰ বাবে সম্বোধন কৰে নৰেন্দ্ৰ মোদীয়ে।