তামিলনাডুৰ শাসকীয় দল দ্ৰাবিড় মুন্নেত্ৰা কাঝাগমে (ডিএমকে) শনিবাৰে তামিলনাডু নিষিদ্ধকৰণ আইন ১৯৩৭ সংশোধন কৰি মানুহৰ জীৱন বিপদাপন্ন কৰিব পৰা অবৈধ সুৰা তৈয়াৰ কৰা আৰু বিক্ৰীৰ দৰে ভয়ানক অপৰাধৰ বাবে শাস্তি আৰু জৰিমনা বৃদ্ধি কৰিছে। উল্লেখ্য যে তামিলনাডু চৰকাৰে সুৰাৰ চোৰাং ব্যৱসায়ীসকলৰ বিৰুদ্ধে এক কঠোৰ ব্যৱস্থা গ্ৰহণ কৰিছে। কাল্লাকুৰিচি জিলাৰ সুৰা ট্ৰেজেডীত ৬০জনকৈও অধিক লোকৰ মৃত্যু হোৱাৰ পৰিপ্ৰেক্ষিতত ৰাজ্যখনৰ চৰকাৰে শনিবাৰে অবৈধ সুৰা ব্যৱসায়ীৰ শাস্তি বৃদ্ধি কৰিবলৈ এই আইন ততাতৈয়াকৈ সংশোধন কৰিছে। সংশোধনী আইনৰ ধাৰা ৪,৫,৬,৭ আৰু ১১ৰ অধীনত এতিয়াৰে পৰা অবৈধ সুৰা ব্যৱসায়ীসকলক আজীৱন কাৰাদণ্ডৰ শাস্তি বিহাৰ লগতে জৰিমনাও বৃদ্ধিৰ ব্যৱস্থা কৰা হৈছে। এই সংশোধিত আইন-২০২৪ চৰকাৰে অধিসূচনা জাৰি কৰাৰ দিনাৰে পৰা কাৰ্যকৰী হ’ব আৰু এই আইনখনৰ লক্ষ্য হৈছে ৰাজ্যখনৰ পৰা অবৈধ সুৰা সম্পূৰ্ণৰূপে নিৰ্মূল কৰা।
সংশোধিত আইন অনুসৰি অবৈধ সুৰাপানৰ ফলত এজন ব্যক্তিৰ মৃত্যু হ’লে সেই চোৰাং ব্যৱসায়ীসকলক আজীৱন কাৰাদণ্ডৰ লগতে ১০ লাখ টকালৈকে জৰিমনা বিহা হ’ব।
লক্ষণীয়ভাৱে কংগ্ৰেছ বিধায়িনী দলৰ নেতা কে চেলভাপেৰুন্থাগাই বিধেয়কখন সমৰ্থন জনাই আৰু ব্যৱস্থাটোত নিয়ন্ত্ৰণ তথা ভাৰসাম্য ৰক্ষাৰ পৰামৰ্শ দি কয় যে আৰক্ষীক সকলো ক্ষমতা দিয়াৰ পৰিৱৰ্তে এখন নিৰ্বাচিত সমিতি গঠন কৰিব লাগে। ইয়াৰ বিপৰীতে পাট্টালি মাক্কাল কাচ্চি (পিএমকে)ৰ নেতা জি কে মণিয়ে দাবী কৰিছে যে চৰকাৰে সুৰা দুৰ্ঘটনাৰ বাবে আৰক্ষী আৰু সংশ্লিষ্ট বিষয়াসকলক দোষী সাব্যস্ত কৰাৰ উপৰিও ৰাজ্যখনত অবৈধ সুৰা সম্পূৰ্ণ নিষেধাজ্ঞা কৰাৰ বাবে পদক্ষেপ গ্ৰহণ কৰিব লাগে।
কাল্লাকুৰিচি সুৰা ট্ৰেজেডী কি?
তামিলনাডুৰ কাল্লাকুৰিচি জিলাত বিষাক্ত সুৰা পান কৰি বিগত ১৮ জুনত ৬১ জন লোকৰ মৃত্যু হোৱাৰ লগতে ২২৫ জন লোক গুৰুতৰভাৱে অসুস্থ হৈ পৰিছিল। ইয়াৰ ভিতৰত ৮৮ জন লোক এতিয়াও চিকিৎসালয়ত চিকিৎসাধীন হৈ আছে। একে সময়তে বাকী ৭৪ জন লোকক চিকিৎসাৰ পিছত অব্যাহতি দিয়া হৈছে। কাল্লাকুৰিচি জিলাৰ কৰুণাপুৰম গাঁৱত এই দুৰ্ঘটনাটো সংঘটিত হৈছিল।
