২০২৪ বৰ্ষৰ নৱেম্বৰ মাহত ছাৰ্বিয়াৰ নৱী নামৰ চহৰৰ এটা ৰে’ল ষ্টেচনত সংঘটিত ভয়ংকৰ দুৰ্ঘটনাত মৃত্যু হৈছিল ১৫ জন লোকৰ। এই ভয়ংকৰ ঘটনাৰ পিছৰে পৰা দেশখনত আৰম্ভ হয় ভয়ংকৰ প্ৰতিবাদ।
ৰে’ল ষ্টেচনৰ ছাদ ভাঙি পৰাৰ ফলত সংঘটিত এই শোকাৱহ ঘটনাটোৰ পিছতে ক্ষুব্ধ হৈ পৰে দেশবাসী। দুৰ্নীতিৰ তদন্ত বিচাৰি ৰাজপথলৈ ওলাই আহে ছাত্ৰ সমাজ। এই প্ৰতিবাদক পূৰ্ণ সমৰ্থন আগবঢ়াই শিক্ষক সমাজেও।
দুৰ্নীতিৰ তদন্ত বিচাৰি ৰাজপথলৈ ওলাই অহা হাজাৰ-হাজাৰ প্ৰতিবাদকাৰীৰ এটাই দাবী- ঘটনাৰ স্বচ্ছ তদন্ত হ’ব লাগিব আৰু দোষী কাঠগড়ালৈ আহিবই লাগিব।
ৰে’ল ষ্টেচন নিৰ্মাণৰ ক্ষেত্ৰত অনিয়ম আৰু দুৰ্নীতি সংঘটিত হোৱা বুলি অভিযোগ তুলি প্ৰতিবাদকাৰীসকলে অভিযোগ কৰে যে ৰেল ষ্টেচনটো দুবাৰকৈ পুনঃনিৰ্মাণ কৰা হৈছিল। এই কামটো কৰিছিল চীনৰ এটা চৰকাৰী কোম্পানীয়ে।
প্ৰতিবাদৰ অভিনৱ পন্থা অৱলম্বন কৰি প্ৰতিবাদকাৰীয়ে প্ৰতিদিনে পুৱা ১১:৫২ বজাত ছাৰ্বিয়াৰ পথ ১৫ মিনিটৰ বাবে অৱৰোধ কৰে। এই সময়ছোৱাত স্তব্ধ হৈ পৰে যান-বাহনৰ চলাচল।
চৰকাৰৰ দুৰ্নীতিৰ বাবে ৰে’ল ষ্টেচনৰ ছাদ ভাঙি পৰা বুলি অভিযোগ উত্থাপন কৰি প্ৰতিবাদকাৰীসকলে ইয়াৰ বাবে প্ৰধানমন্ত্ৰী আৰু নৱীৰ মেয়ৰক দোষাৰোপ কৰি পদত্যাগৰ দাবী উত্থাপন কৰে।
এই ঘটনাৰ প্ৰতিবাদত শ-শ লোকে ৰঙা গ্ল’ভছ পিন্ধি ম’বাইল ফোনৰ ফ্লেছ লাইট জ্বলাই ৰাজপথলৈ ওলাই আহে। বেলগ্ৰেড বিশ্ববিদ্যালয়ৰ ছাত্ৰ-ছাত্ৰীসকলে আৰম্ভ কৰা এই প্ৰতিবাদ ক্ৰমান্বয়ে সাধাৰণ জনতাৰ মাজতো বিয়পি পৰে।
প্ৰতিবাদ তীব্ৰতৰ হৈ পৰাৰ প্ৰতি লক্ষ্য ৰাখি ছাৰ্বিয়াৰ প্ৰধানমন্ত্ৰী মিলোছ বুচেভিকে মঙলবাৰে পদত্যাগ কৰাৰ কথা ঘোষণা কৰে। প্ৰধানমন্ত্ৰীগৰাকীয়ে কয় যে তেওঁৰ পদত্যাগৰ উদ্দেশ্য হৈছে ছাৰ্বিয়াত উত্তেজনা হ্ৰাস কৰা। তদুপৰি তেওঁ সকলোকে শান্তি বজাই ৰাখিবলৈও আহ্বান জনায়।
উল্লেখ্য যে, দুৰ্নীতিৰ অভিযোগ তুলি চৰকাৰৰ বিৰুদ্ধে প্ৰতিবাদ কৰিবলৈ ওলাই অহা লোকৰ ওচৰত সেও মানি এখন দেশৰ প্ৰধানমন্ত্ৰীয়ে পদত্যাগ কৰা ঘটনাই বিশ্বজুৰি তীব্ৰ প্ৰতিক্ৰিয়াৰ সৃষ্টি কৰিছে। অৱশ্যে ভাৰতবৰ্ষৰ বাসিন্দাৰ বাবে এই খবৰ যথেষ্ট আশ্বৰ্যকৰ।
