আমেৰিকাৰ ৰাষ্ট্ৰপতি ড’নাল্ড ট্ৰাম্পে কানাডা, মেক্সিকো আৰু চীনৰ বিৰুদ্ধে শুল্ক আৰোপ কৰাৰ নিৰ্দেশৰ ফলত বাণিজ্য যুদ্ধৰ সূচনা হৈছে।
শনিবাৰে সন্ধিয়াৰ পৰা কাৰ্যকৰী হোৱা কানাডা, মেক্সিকো আৰু চীনৰ পৰা আমদানি কৰা সামগ্ৰীৰ ওপৰত শুল্ক বৃদ্ধিৰ সিদ্ধান্ত গ্ৰহণ কৰিছে আমেৰিকাৰ ৰাষ্ট্ৰপতি ড’নাল্ড ট্ৰাম্পে। এই সিদ্ধান্তৰ লগে লগে আমেৰিকা আৰু এই দেশসমূহৰ মাজত বাণিজ্যিক যুদ্ধ আৰম্ভ হৈছে, যি আন দেশতো আৰু অধিক বিয়পি পৰিব পাৰে।
কানাডা আৰু মেক্সিকোৰ পৰা অহা সামগ্ৰীৰ ওপৰত অতিৰিক্ত ২৫% শুল্ক আৰোপ কৰা হৈছে। চীনৰ পৰা আমদানি কৰা সামগ্ৰীৰ ওপৰত ১০% শুল্ক বৃদ্ধি কৰা হৈছে। অৱশ্যে কানাডাৰ পৰা আমদানি কৰা তেলৰ ওপৰত মাত্ৰ ১০% শুল্ক আৰোপ কৰা হ’ব।
ঘোষণা কৰা শুল্কৰ প্ৰথম ছেটত ভাৰতৰ নাম উল্লেখ কৰা নাছিল আমেৰিকাৰ ৰাষ্ট্ৰপতি ড’নাল্ড ট্ৰাম্পে।
গৱেষণা আৰু তথ্য ব্যৱস্থা অনুসৰি, আমেৰিকাৰ বাণিজ্যিক ঘাটিত আটাইতকৈ বেছি অৰিহণা যোগোৱা দেশসমূহ হৈছে চীন, মেক্সিকো আৰু কানাডা। চীনৰ অৱদান ৩০.২ শতাংশ, মেক্সিকোৰ ১৯ শতাংশ আৰু কানাডাৰ ১৪ শতাংশ, আনহাতে ভাৰত এই তালিকাত ৯ নম্বৰত আছে।
চীনৰ সামগ্ৰীৰ ওপৰত শুল্ক আৰোপ কৰিবলৈ আমেৰিকাৰ নিৰ্দেশক লৈ তীব্ৰ প্ৰতিবাদ সাব্যস্ত কৰিছে চীনে। দেওবাৰে বাণিজ্য মন্ত্ৰালয়ে কয় যে, চীনে বিশ্ব বাণিজ্য সংস্থাৰ ওচৰত গোচৰ তৰি নিজৰ স্বাৰ্থ ৰক্ষাৰ বাবে উপযুক্ত প্ৰতিকাৰ ব্যৱস্থা গ্ৰহণ কৰিব।
সংবাদ মাধ্যমৰ বাতৰি অনুসৰি মন্ত্ৰালয়ে কয় যে, আমেৰিকাই একপক্ষীয় শুল্ক বৃদ্ধি কৰাটো বিশ্ব বাণিজ্য সংস্থাৰ নিয়মৰ গুৰুতৰ উলংঘা। এই পদক্ষেপে আমেৰিকাৰ নিজৰ সমস্যা সমাধান কৰাত ব্যৰ্থ হোৱাই নহয়, চীন-আমেৰিকাৰ স্বাভাৱিক অৰ্থনৈতিক আৰু বাণিজ্যিক সহযোগিতাত বাধাৰ সৃষ্টি কৰে। চীনে আমেৰিকাৰ এই সিদ্ধান্তৰ তীব্ৰ বিৰোধিতা কৰিছে আৰু ইয়াৰ ওপৰত গভীৰভাৱে অসন্তুষ্ট।
কানাডাৰ প্ৰধানমন্ত্ৰী জাষ্টিন ট্ৰুডোৱে শনিবাৰে কয় যে, ৰাষ্ট্ৰপতি ড’নাল্ড ট্ৰাম্পৰ নতুন শুল্কৰ প্ৰতিশোধ হিচাপে তেওঁৰ দেশে আমেৰিকাৰ বহু আমদানিৰ ওপৰত ২৫% শুল্ক আৰোপ কৰিব। তেওঁ আমেৰিকানসকলক সকীয়াই দিয়ে যে ট্ৰাম্পৰ এই সিদ্ধান্তই তেওঁলোকৰ বাবে গুৰুতৰ পৰিণতি কঢ়িয়াই আনিব।
ট্ৰুডোৱে কয় যে, তেওঁ ১৫৫ বিলিয়ন কানাডিয়ান ডলাৰ (১০৭ বিলিয়ন মাৰ্কিন ডলাৰ) মূল্যৰ আমেৰিকাৰ সামগ্ৰীৰ ওপৰত শুল্ক আৰোপ কৰিছে, যিটো দীৰ্ঘদিনীয়া মিত্ৰ দেশসমূহৰ মাজত সম্পৰ্ক অৱনতি ঘটিছে, যিসকলে বিশ্বৰ আটাইতকৈ দীঘলীয়া স্থল সীমান্তৰ অংশীদাৰ।
ইফালে শনিবাৰে মেক্সিক’ৰ ৰাষ্ট্ৰপতি ক্লাউডিয়া শ্বেইনবামে আমেৰিকাৰ আমদানিৰ ওপৰত প্ৰতিশোধমূলক শুল্ক আৰোপ কৰাৰ কথা কয়। শ্বেইনবামে কয় যে, তেওঁৰ চৰকাৰে নিজৰ শীৰ্ষ বাণিজ্যিক অংশীদাৰৰ সৈতে মুখামুখি হোৱাতকৈ আলোচনা বিচাৰে যদিও মেক্সিকোৱে ইয়াৰ প্ৰতি সঁহাৰি জনাবলৈ বাধ্য হৈছে।
