ফ্ৰান্সৰ ৰাষ্ট্ৰপতিৰ আমন্ত্ৰণত ভাৰতৰ প্ৰধানমন্ত্ৰী নৰেন্দ্ৰ মোদীয়ে ১০-১২ ফেব্ৰুৱাৰীলৈ ফ্ৰান্স ভ্ৰমণলৈ যাব। ইয়াত অনুষ্ঠিত হ’বলগীয়া এআই শীৰ্ষ সন্মিলনত প্ৰধানমন্ত্ৰী মোদীয়ে অংশ ল’ব। আমেৰিকাৰ উপ-ৰাষ্ট্ৰপতি আৰু চীনৰ উপ-প্ৰধানমন্ত্ৰীকে ধৰি কেইবাখনো দেশৰ কেইবাগৰাকীও ৰাষ্ট্ৰপতিয়ে অংশগ্ৰহণ কৰিব।
১০ ফেব্ৰুৱাৰীৰ সন্ধিয়া প্ৰধানমন্ত্ৰী মোদীয়ে পেৰিছত উপস্থিত হ’ব, য’ত তেওঁ ফ্ৰান্সৰ ৰাষ্ট্ৰপতি ইমানুৱেল মেক্ৰনে আয়োজন কৰা নৈশ আহাৰত অংশগ্ৰহণ কৰিব। ইয়াৰ পিছতে আমেৰিকা ভ্ৰমণ কৰিব প্ৰধানমন্ত্ৰী মোদীয়ে।
ভাৰতৰ বৈদেশিক সচিব বিক্ৰম মিশ্ৰীয়ে কয় যে আমেৰিকাৰ ৰাষ্ট্ৰপতি ড’নাল্ড ট্ৰাম্পৰ আমন্ত্ৰণত ১২-১৩ ফেব্ৰুৱাৰীত প্ৰধানমন্ত্ৰী মোদীয়ে আমেৰিকা ভ্ৰমণ কৰিব। ট্ৰাম্পে দ্বিতীয়বাৰৰ বাবে শপত গ্ৰহণ কৰাৰ পিছত এইটোৱেই হ’ব প্ৰধানমন্ত্ৰী মোদীৰ প্ৰথম ভ্ৰমণ।
নতুন প্ৰশাসন ক্ষমতালৈ অহাৰ তিনি সপ্তাহৰ ভিতৰতে প্ৰধানমন্ত্ৰী মোদীক আমেৰিকা ভ্ৰমণৰ বাবে আমন্ত্ৰণ জনোৱা হয়, যিয়ে দুয়োখন দেশৰ মাজত থকা সুদৃঢ় সম্পৰ্কক দেখুৱাইছে।
উল্লেখ্য যে, ট্ৰাম্পৰ প্ৰথম কাৰ্যকালত ২০১৭ আৰু ২০১৯ চনত প্ৰধানমন্ত্ৰী মোদীয়ে আমেৰিকা ভ্ৰমণ কৰিছিল।
