হিমাচল প্ৰদেশৰ বিলাসপুৰত ভূমিস্খলনৰ ফলত ১৫ জন লোকৰ মৃত্যু হোৱাৰ খবৰ পোৱা গৈছে। জানিব পৰা অনুসৰি ৩০ জন যাত্ৰী কঢ়িয়াই নিয়া এখন বাছৰ ওপৰত পাহাৰৰ বৃহত অংশ খহি পৰে। যাৰ ফলত ভূমিস্খলনৰ ধ্বংসাৱশেষৰ তলত আৱদ্ধ হৈ পৰে যাত্ৰীসকল। এই পৰ্যন্ত উদ্ধাৰ হৈছে ১৫ জন লোকৰ মৃতদেহ। মৃতকৰ সংখ্যা আৰু বৃদ্ধি পোৱাৰ সম্ভাৱনা আছে।
ঘটনাৰ খবৰ পোৱাৰ লগে লগে ঘটনাস্থলত উদ্ধাৰকাৰী দল উপস্থিত হৈ সাহায্য আৰু উদ্ধাৰ অভিযান আৰম্ভ কৰে।
এই ঘটনাক লৈ গভীৰ শোক প্ৰকাশ কৰে মুখ্যমন্ত্ৰী সুখৱিন্দৰ সিঙে। শোক প্ৰকাশ কৰাৰ লগতে মৃত লোকসকলৰ আত্মাৰ শান্তিৰ বাবে প্ৰাৰ্থনা কৰে।
তেওঁ উল্লেখ কৰে যে এই জটিল সময়ত ৰাজ্য চৰকাৰে ক্ষতিগ্ৰস্ত পৰিয়ালসমূহৰ লগত আছে আৰু তেওঁলোকক সম্ভৱপৰ সকলো সহায় আগবঢ়াব।
জিলা প্ৰশাসনৰ সৈতে অহৰহ যোগাযোগত থকা মুখ্যমন্ত্ৰীয়ে সাহায্য আৰু উদ্ধাৰ অভিযান ক্ষিপ্ৰতাৰে কৰিবলৈ নিৰ্দেশ দিছে। আহতসকলক যাতে তৎক্ষণাত চিকিৎসাৰ বাবে চিকিৎসালয়লৈ লৈ যোৱা হয় আৰু তেওঁলোকৰ চিকিৎসাৰ বাবে পৰ্যাপ্ত ব্যৱস্থা কৰা হয় তাৰ বাবেও তেওঁ প্ৰশাসনক নিৰ্দেশ দিছে।
