সাংহাই সহযোগিতা সংস্থা (এছ চি অ’)ৰ শীৰ্ষ সন্মিলনৰ বাবে শনিবাৰে চীনৰ টিয়ানজিনত উপস্থিত হোৱা ভাৰতৰ প্ৰধানমন্ত্ৰী নৰেন্দ্ৰ মোদীয়ে দেওবাৰে চীনৰ ৰাষ্ট্ৰপতি ঝি জিনপিঙৰ সৈতে দ্বিপাক্ষিক আলোচনাত মিলিত হয়।
প্ৰধানমন্ত্ৰী নৰেন্দ্ৰ মোদীৰ সৈতে প্ৰতিনিধি পৰ্যায়ৰ আলোচনাৰ সময়ত চীনৰ ৰাষ্ট্ৰপতি জিনপিঙে প্ৰাৰম্ভিক ভাষণত কয়, ‘প্ৰধানমন্ত্ৰী মহোদয়, আপোনাক পুনৰ লগ পাই মই অতি আনন্দিত হৈছো। মই আপোনাক এছচিঅ’ শীৰ্ষ সন্মিলনৰ বাবে চীনলৈ স্বাগতম জনাইছো। যোৱা বছৰ কাজানত আমাৰ বৈঠক সফল আছিল। বিশ্বই এক বৃহৎ পৰিৱৰ্তনৰ দিশত আগবাঢ়িছে। আমি বিশ্বৰ দুখন জনবহুল দেশ। এনে পৰিস্থিতিত সম্পৰ্ক ভাল হোৱা আৰু ড্ৰেগন আৰু হাতী একত্ৰিত হোৱাটো অতি গুৰুত্বপূৰ্ণ।’
তেওঁ কয়, ‘ভাৰত আৰু চীন হৈছে বিশ্বৰ দুখন প্ৰাচীন সভ্যতাৰ দেশ। ড্ৰেগন আৰু হাতী একত্ৰিত হোৱাটো গুৰুত্বপূৰ্ণ। ভাৰত আৰু চীনৰ বন্ধুত্ব গুৰুত্বপূৰ্ণ। ভাৰত আৰু চীনৰ বাবে একত্ৰিত হোৱাটো গুৰুত্বপূৰ্ণ। বন্ধুত্ব আৰু ভাল প্ৰতিবেশী হোৱাটো গুৰুত্বপূৰ্ণ।‘
এছিয়া আৰু বিশ্বৰ শান্তি আৰু সমৃদ্ধিৰ বাবে দুয়োখন দেশে একেলগে কাম কৰিব লাগিব বুলিও উল্লেখ কৰে জিনপিঙে।
ইফালে প্ৰধানমন্ত্ৰী মোদীয়ে নিজৰ ভাষণত কয়, ‘দুয়োখন দেশৰ মাজত প্ৰত্যক্ষ বিমান সেৱা পুনৰ আৰম্ভ কৰা হৈছে। দুয়োখন দেশৰ ২.৮ বিলিয়ন জনসাধাৰণৰ স্বাৰ্থ আমাৰ সহযোগিতাৰ সৈতে জড়িত। ইয়াৰ ফলত মানৱতাৰ কল্যাণো হ’ব।’
‘আমি আমাৰ সম্পৰ্কক আগুৱাই নিয়াৰ বাবে প্ৰতিশ্ৰুতিবদ্ধ। এছ চি অ’ৰ সফল আয়োজনৰ বাবে আপোনাক অভিনন্দন জনাইছো’, এইদৰে নিজৰ ভাষণত কয় প্ৰধানমন্ত্ৰী মোদীয়ে।
দীৰ্ঘদিনীয়া তিক্ততা পৰিহাৰ কৰি এছ চি অ’ সন্মিলনৰ জৰিয়তে শীৰ্ষ নেতা দুগৰাকীৰ মাজত হোৱা প্ৰায় এঘণ্টীয়া এই বৈঠকখন আন্তঃৰাষ্ট্ৰীয় পৰ্যায়ত যথেষ্ট চৰ্চা হোৱাৰ লগতে গুৰুত্বপূৰ্ণ বুলি বিবেচিত হৈছে।
