অপাৰেশ্যন সিন্দূৰক লৈ শেহতীয়াকৈ উত্তপ্ত হৈ পৰিছে দেশৰ ৰাজনীতি। লোকসভাৰ বিৰোধী দলৰ দলপতি ৰাহুল গান্ধীয়ে এটা ভিডিঅ’ শ্বেয়াৰ কৰি ভাৰতে আক্ৰমণ কৰিব বুলি পূৰ্বেই পাকিস্তানক জনাই দিয়া বুলি বিদেশ মন্ত্ৰী এছ জয়শংকৰৰ বিৰুদ্ধে গুৰুতৰ অভিযোগ উত্থাপন কৰিছে।
ৰাহুল গান্ধীয়ে কৰা এই অভিযোগৰ ভিত্তিতেই কংগ্ৰেছ দলৰ সাধাৰণ সম্পাদক জয়ৰাম ৰমেশে বিদেশ মন্ত্ৰীগৰাকীৰ পদত্যাগ দাবী কৰিছে।
তেওঁ ছ’চিয়েল মিডিয়া প্লেটফৰ্ম এক্সত লিখিছে, ‘বিদেশ মন্ত্ৰী- আপুনি আমেৰিকাৰ সমকক্ষই কৰা দাবীৰ প্ৰতি কোনো সঁহাৰি দিয়া নাই, ৰহস্যজনকভাৱে মৌনতা অৱলম্বন কৰিছে। তেওঁ নিজৰ পদত কেনেকৈ থাকিব পাৰে সেয়া বুজাৰ বাহিৰত। প্ৰধানমন্ত্ৰী নৰেন্দ্ৰ মোদীয়ে ২০২০ চনৰ ১৯ জুনত চীনক ৰাজহুৱাভাৱে ক্লিন চিট দি আমাৰ আলোচনাৰ স্থিতিৰ অন্ত পেলাইছিল। যিজন ব্যক্তিক তেওঁ বৈদেশিক মন্ত্ৰী হিচাপে নিযুক্তি দিছে, সেই ব্যক্তিজনে ভাৰতক প্ৰতাৰণা কৰিছে।’
প্ৰকৃততে ৰাহুল গান্ধীয়ে এটা ব্যক্তিগত নিউজ চেনেলৰ এটা ভিডিঅ’ শ্বেয়াৰ কৰি লিখিছে, ‘পাকিস্তানক আক্ৰমণ কৰাৰ খবৰ আগতেই দিয়াটো অপৰাধ। ভাৰত চৰকাৰে এয়া কৰা বুলি বিদেশ মন্ত্ৰীয়ে সাৰ্বজনিকভাৱে স্বীকাৰ কৰিছে।’
তেওঁ লগতে প্ৰশ্ন উত্থাপন কৰি কয়, ‘ইয়াৰ পৰিণাম স্বৰূপে ভাৰতে কিমানখন বায়ুসেনাৰ বিমান হেৰুৱালে?’
ৰাহুল গান্ধীৰ এই অভিযোগৰ বিপৰীতে পি আই বিৰ ফেক্ট চেকে এইটো নিশ্চিত কৰিছিল যে ভাৰতৰ বৈদেশিক মন্ত্ৰী এছ জয়শংকৰে এইধৰণৰ কোনো মন্তব্য ক’তো দিয়া নাই।
