মঙলবাৰে উত্তৰাখণ্ডৰ উত্তৰকাশী জিলাৰ ধৰালীত ভয়ংকৰ ডাৱৰ বিস্ফোৰণ সংঘটিত হয়। এই ডাৱৰ বিস্ফোৰণৰ ফলত ৪ জন লোকৰ মৃত্যু হোৱাৰ লগতে শতাধিক লোক নিৰুদ্দেশ হোৱাৰ আশংকা প্ৰকাশ কৰা হৈছে।
ডাৱৰ বিস্ফোৰণৰ পিছতেই খীৰ গংগা নদীৰ জলপৃষ্ঠ হঠাত বৃদ্ধি পোৱাৰ ফলত হোৱা ভয়ংকৰ বানত বহু বাসগৃহ, ব্যৱসায়িক প্ৰতিষ্ঠান, হোটেল-ৰেষ্টুৰেণ্ট আদি একপ্ৰকাৰ ধ্বংসস্তুপত পৰিণত হৈ পৰে।
সম্প্ৰতি ভাইৰেল হৈ থকা এটা ৩৪ ছেকেণ্ডৰ ভিডিঅ’ত দেখা গৈছে যে ডাৱৰ বিস্ফোৰণৰ পিছত হোৱা ভূমিস্খলনৰ পৰা হাত সাৰিবলৈ অঞ্চলটোৰ লোকসকলে নিৰাপদ স্থানলৈ ঢাপলি মেলাৰ চেষ্টা চলায়। কিন্তু প্ৰকৃতিয়ে ধাৰণ কৰা কাল ৰূপত সাৰি নগ’ল সাধাৰণ লোক।
ডাৱৰ বিস্ফোৰণৰ পিছত হোৱা ভয়ংকৰ বানে নিমিষতে খহাই লৈ যায় কেইবাটাও সু-উচ্চ অট্টালিকা। দৃশ্য ইমানেই ভয়ংকৰ যে পাহাৰৰ ওপৰৰ পৰা নামি অহা বোকা-শিল-পানীৰ ঢলৰ মাজত পোত যায় শ-শ বাসগৃহ।
উত্তৰকাশী জিলাৰ শীৰ্ষ বিষয়া প্ৰশান্ত আৰ্যই এই ঘটনাত চাৰিজন লোকৰ মৃত্যু হোৱাৰ কথা নিশ্চিত কৰিছে। তেওঁ লগতে এই ঘটনাত কিমান ক্ষয়-ক্ষতি হৈছে তাৰ তথ্য কিছু সময়ৰ পিছতেই ৰাজহুৱা কৰিব বুলিও কয়।
উল্লেখ্য যে, বিগত কিছু দিন ধৰি নেৰানেপেৰা বৰষুণ অব্যাহত আছে জিলাখনত। ইয়াৰ মাজতে মঙলবাৰে জিলাখনৰ ধৰালীত অতিবৃষ্টি বা ডাৱৰ বিস্ফোৰণৰ খবৰ পোহৰলৈ আহে। ঘটনাৰ খবৰ পোৱা মাত্ৰকে এছডিআৰএফ আৰক্ষী তথা প্ৰশাসনৰ দল ঘটনাস্থলীলৈ ৰাওনা হয়।
ইফালে উত্তৰাখণ্ডৰ মুখ্যমন্ত্ৰী পুষ্কৰ সিং ধামীয়ে ধৰালীত হোৱা বৃহৎ ক্ষতিৰ বাবে উদ্বেগ প্ৰকাশ কৰাৰ লগতে ক্ষতিগ্ৰস্ত লোকসকলৰ প্ৰতি শোক প্ৰকাশ কৰে। তেওঁ লগতে উদ্ধাৰকাৰী দলে ক্ষীপ্ৰতাৰে উদ্ধাৰ অভিযান চলাই থকা বুলিও জানিব দিয়ে।
