হজলৈ গৈ চৌদিত মৃত্যু হৈছে ১৪জনকৈ হাজিৰ। ১৪ জুনৰ পৰা আৰম্ভ হৈছে হজযাত্ৰা। ১৯ জুন পৰ্যন্ত চৌদিত ভিৰ কৰিব কোটি কোটি হাজিয়ে।
চৌদি আৰবত উৎকট গৰমৰ বাবে ভীষণ কষ্ট পাইছে হাজিসকলে। হজ কৰিবলৈ যোৱা যাত্ৰী ক্ৰমাৎ অসুস্থ হৈ পৰিছে। দেওবাৰে ১৪গৰাকী হজযাত্ৰীৰ মৃত্যু হৈছে বুলি প্ৰকাশ কৰিছে চৌদি প্ৰশাসনে। মৃত্যু হোৱা আটাইকেইজন লোক হৈছে জৰ্দানৰ। জৰ্দান চৰকাৰে প্ৰকাশ কৰা মতে ১৪জনৰ প্ৰাণ যোৱাৰ লগতে সন্ধানহীন হৈ আছে ১৭জনকৈ লোক।
মক্কাত এইপৰ্যন্ত তাপমাত্ৰাই অতিক্ৰম কৰিছে ৪৭ ডিগ্ৰী। মক্কাত তাপমাত্ৰা ৪৭ আৰু মীনা চহৰত তাপমাত্ৰা ৪৬ ডিগ্ৰী। এই উৎকট গৰমৰ বাবে আন ৰাষ্ট্ৰৰ পৰা যোৱা হাজিসকল ক্ৰমাৎ অসুস্থ হৈ পৰিছে। চৌদি স্বাস্থ্য মন্ত্ৰ্যালয়ৰ প্ৰবক্তা মহম্মদ অল আব্দুল্লালিয়ে প্ৰকাশ কৰা মতে হীট ষ্ট্ৰক আৰু ছানষ্ট্ৰকৰ বাবে ২,৭৬০গৰাকী লোক অসুস্থ হৈ পৰিছে। আনহাতে অসুস্থতাৰ সংখ্যা বৃদ্ধি পাব বুলিও প্ৰকাশ কৰিছে স্বাস্থ্য মন্ত্ৰ্যালয়ে। সেয়ে হাজিসকলক তীব্ৰ ৰ’দত ওলাব নালাগে বুলি জাননী জাৰি কৰিছে চৌদি প্ৰশাসনে। উৎকট গৰম এতিয়া চৌদিৰ বাবে প্ৰত্যাহ্বান হৈ পৰিছে প্ৰকাশ কৰিছে প্ৰশাসনে।
