সুপ্ৰভাত। দিনটোৰ আৰম্ভণিতেই কেইটামান গুৰুত্বপূৰ্ণ খবৰেৰে আৰম্ভ কৰিছো ৰাতিপুৱাৰ এই শিতানটো।
১৫ মাৰ্চত অসমলৈ আহিব কেন্দ্রীয় গৃহমন্ত্ৰী অমিত শ্বাহ। ডেৰগাঁৱৰ লাচিত বৰফুকন পুলিচ একাডেমীৰ নৱনিৰ্মিত ভৱন মুকলি কৰিব গৃহমন্ত্ৰীগৰাকীয়ে। ডেৰগাঁৱৰ পৰা পোনে পোনে মিজোৰামলৈ ৰাওনা হ’ব গৃহমন্ত্ৰীগৰাকী।
১০ মাৰ্চত মুকলি হ’ল মহাৰাজ পৃথু উৰণসেতু। পুৱাই উৰণসেতুখনত উখল-মাখল পৰিৱেশ। উত্তৰ-পূবৰ দীৰ্ঘতম উৰণসেতু চাবলৈ উপস্থিত বহু লোক। মুখ্যমন্ত্ৰী ড০ হিমন্ত বিশ্ব শৰ্মাই মুকলি কৰিলে নুনমাটি-দীঘলীপুখুৰী সংযোগী উৰণীয়া সেতু। ৩দিনলৈ walking zone হিচাপে থাকিব সেতুখন। ১৪ মাৰ্চৰ পৰাহে যানবাহন চলাচল কৰিব নৱনিৰ্মিত উৰণীয়া সেতুখনত।
ইৰাণ, ইজৰাইল আৰু আমেৰিকাৰ মাজত চলি থকা সংঘাতক লৈ ১০ মাৰ্চত হোৱা কেবিনেট বৈঠকৰ সময়ত প্ৰধানমন্ত্ৰী নৰেন্দ্ৰ মোদীয়ে এক উল্লেখযোগ্য বক্তব্য আগবঢ়ায়। তেওঁ আহ্বান জনায় যে মন্ত্ৰালয় আৰু বিভাগসমূহে যাতে এইয়া নিশ্চিত ৰাখে যেন মধ্যপ্ৰাচ্যৰ সংকটে ভাৰতৰ জনতাৰ ওপৰত প্ৰভাৱ নেপেলায়। তেওঁ নিজ মন্ত্ৰালয়ক যিকোনো সম্ভাৱ্য প্ৰত্যাহ্বানৰ বাবে সম্পূৰ্ণৰূপে সাজু হ’বলৈ আহ্বান জনায়।
আমেৰিকাৰ ৰাষ্ট্ৰপতি ড’নাল্ড ট্ৰাম্পে ইৰাণ যুদ্ধ শীঘ্ৰে সমাপ্ত হ’ব বুলি ইংগিত দিয়াৰ পিছত খাৰুৱা তেলৰ মূল্য তীব্ৰভাৱে হ্ৰাস পাইছে। ব্ৰেণ্ট খাৰুৱা তেল প্ৰতি বেৰেলত ৯১.৫৫ ডলাৰলৈ হ্ৰাস পাইছে। পশ্চিম টেক্সাছ ইণ্টাৰমিডিয়েট (WTI) খাৰুৱা তেলৰ মূল্য ১০% হ্ৰাস পাই প্ৰতি বেৰেলত ৮৫.০২ ডলাৰ হয়। মধ্যপ্ৰাচ্যত চলি থকা উত্তেজনাই বিশ্ব শক্তিৰ বজাৰ কঁপাই তুলিছে আৰু মুদ্ৰাস্ফীতিৰ সংকটৰ বিষয়ে নতুন চিন্তাৰ সৃষ্টি কৰিছে।
