অধিকসংখ্যক লোকে চাইনাইডক পৃথিৱীৰ আটাইতকৈ বিপদজনক বিষ বুলি গণ্য কৰে। কিন্তু সঁচাকৈয়ে জানো চাইনাইড আটাইতকৈ বিপদজনক? কিয়নো আটাইতকৈ বিষাক্ত ৰাসায়নিক পদাৰ্থ বিচাৰি উলিওৱাটো একেবাৰেই সহজ কাম নহয়।
চাইনাইড হৈছে এক অতিকৈ বিপদজনক ৰাসায়নিক পদাৰ্থ যিয়ে তাৎক্ষণিক মৃত্যুৰ ছবি অংকন কৰে। চলচ্চিত্ৰ আৰু অপৰাধৰ কাহিনীত ইয়াৰ নাম প্ৰায়েই উল্লেখ কৰা হয় আৰু বহুতে বিশ্বাস কৰে যে, ই পৃথিৱীৰ আটাইতকৈ বিষাক্ত ৰাসায়নিক পদাৰ্থ।
কিন্তু সঁচাকৈয়ে চাইনাইড পৃথিৱীৰ আটাইতকৈ বিপদজনক ৰাসায়নিক পদাৰ্থ নে আন কোনো পদাৰ্থই ইয়াক চেৰ পেলাইছে এই সম্বন্ধে আমাৰ এক বিশেষ প্ৰতিবেদন-
চাইনাইডৰ উপৰি পৃথিৱীত আৰু অধিক বিষাক্ত ৰাসায়নিক পদাৰ্থ আছে। ইয়াৰ ভিতৰত এবিধ হৈছে বোটুলিনম-টক্সিন-ক্ল’ষ্ট্ৰিডিয়াম, যি বোটুলিনম নামৰ এক বেক্টেৰিয়াৰ পৰা উৎপন্ন হয়। ইয়াৰ প্ৰভাৱত স্নায়ুৱে সংকেত দিয়া বন্ধ কৰে, পেশীয়ে কাম কৰা বন্ধ কৰে অৰ্থাৎ পক্ষাঘাত হয়, যাৰ ফলত এজন ব্যক্তি মৃত্যুমুখত পৰে।
আকৌ, ব্ৰিটিছ সেনাই ৰাসায়নিক অস্ত্ৰ হিচাপে এক শক্তিশালী স্নায়ু এজেণ্ট ভিএক্সৰ সৃষ্টি কৰিছিল। ই পেশীবোৰ পক্ষাঘাতগ্ৰস্ত কৰে আৰু ব্যক্তি এগৰাকীক শ্বাসৰুদ্ধ কৰি তোলে।
ঠিক তেনেদৰে ক্ল’ৰিন ট্ৰাইফ্ল’ৰাইডো হৈছে এক অতি ক্ষয়কাৰী ৰঙবিহীন গেছ। ই ইমানেই প্ৰতিক্ৰিয়াশীল যে পানী, বালি আৰু আনকি পূৰ্বৰ পোৰা বস্তুৰ ছাঁইৰ দৰে ক্ষতিহীন পদাৰ্থৰ সংস্পৰ্শলৈ আহিলেও ই নিজে নিজে বিস্ফোৰণ হৈ যায়।
আকৌ চুইমিংপুলত বীজাণুনাশক হিচাপে ব্যৱহাৰ কৰা ক্ল’ৰিণকো এক বিষাক্ত ৰাসায়নিক পদাৰ্থ হিচাপে গণ্য কৰা হয়। ই মানৱ শৰীৰত শ্বাস-প্ৰশ্বাস সম্বন্ধীয় সমস্যাৰ সৃষ্টি কৰে।
