পুৰীৰ ৰত্ন ভাণ্ডাৰত থকা সুৰংগ সন্দৰ্ভত কিমান সত্যতা আছে। সেই সন্দৰ্ভত অচিৰেই অৱসান ঘটিব উৎকন্ঠাৰ। কিয়নো পুৰীৰ বিখ্যাত দ্বাদশ শতিকাৰ জগন্নাথ মন্দিৰৰ ৰত্ন ভাণ্ডাৰত লেজাৰ স্কেন কৰা হ’ব। ইয়াৰ বাবে এএছআই অৰ্থাৎ ভাৰতীয় পুৰাতাত্ত্বিক জৰীপ সম্পূৰ্ণৰূপে প্ৰস্তুত কৰা হৈছে।
উল্লেখ্য যে, জগন্নাথ মন্দিৰৰ এটা গোপন সুৰংগ আৰু ৰত্ন ভাণ্ডাৰ আছে বুলি অনুমান কৰা হৈছে। য’ত মূল্যৱান গহনা থকাৰ সম্ভাৱনা কৰিছে একাংশ লোকে। পুৰীৰ গজপতি মহাৰাজা দিবিয়া সিং দেৱে কৈছিল যে, এএছআইয়ে অনুসন্ধানৰ বাবে আধুনিক প্ৰযুক্তি ব্যৱহাৰ কৰিব পাৰে। কোৱা হৈছে যে, মন্দিৰ প্ৰশাসনৰ পুংখানুপুংখ অনুসন্ধানৰ পিছত ৰত্ন ভাণ্ডাৰৰ বাহিৰ আৰু ভিতৰৰ কোঠা দুয়োটা মেৰামতিৰ বাবে এএছআইক হস্তান্তৰ কৰা হ’ব।
ইফালে, এই সমগ্ৰ ঘটনা সন্দৰ্ভত নিৰীক্ষণ সমিতিৰ মুৰব্বী, ওড়িশা উচ্চ ন্যায়ালয়ৰ প্ৰাক্তন ন্যায়াধীশ বিশ্বনাথ ৰথে প্ৰতিক্ৰিয়া প্ৰকাশ কৰিছে। ন্যায়াধীশ বিশ্বনাথ ৰথে, আন ১০ জন সদস্যৰ সৈতে ৰত্ন ভাণ্ডাৰৰ ভিতৰৰ কোঠাত সাত ঘণ্টাতকৈ অধিক সময় অতিবাহিত কৰিছিল। তেওঁলোকে কয় যে, ৰত্ন ভাণ্ডাৰত কোনো গোপন সুৰংগ নাই। “আমাৰ পৰিদৰ্শনত আমি কোনো সুৰংগসদৃশ বৈশিষ্ট্যৰ প্ৰমাণ পোৱা নাছিলো।” তেওঁ সংবাদ মাধ্যম আৰু সামাজিক মাধ্যমক বিষয়টোৰ ওপৰত ভুল তথ্য প্ৰচাৰ নকৰিবলৈ আহ্বান জনায়।
আনহাতে, সমিতিৰ সদস্য আৰু সেৱক দুৰ্গা দাসমোহপাত্ৰই কয়, “আমি প্ৰভুৰ কোষাগাৰৰ ভিতৰত কোনো গোপন কক্ষ বা সুৰংগ বিচাৰি পোৱা নাছিলো। ৰত্ন ভাণ্ডাৰ প্ৰায় ২০ ফুট ওখ আৰু ১৪ ফুট দীঘল। তেওঁলোকে পৰিদৰ্শনৰ সময়ত কিছুমান সৰু-সুৰা ত্ৰুটিও লক্ষ্য কৰিছিল। বহুতো সৰু শিল ছাদৰ পৰা খহি পৰিছিল আৰু দেৱালত ফাট আছিল।
