কাছাৰৰ চলতাকান্দিত সংঘটিত হৈছে এক ভয়ংকৰ ঘটনা। বিগত কিছুদিনৰ পৰা হৈ থকা ধাৰাসাৰ বৰষুণৰ ফলত এটা ঘৰৰ মাটিৰ দেৱাল খহি পৰাৰ ফলত এটি ৬ মহীয়া শিশুসহ দুজনৰ মৃত্যু হৈছে।
মৃত ৬ মহীয়া শিশুটিৰ নাম আশিফ উদ্দিন আৰু আনজন মৃতকক আজিৰ উদ্দিন বুলি চিনাক্ত কৰা হৈছে। জানিব পৰা অনুসৰি আজি পুৱতি নিশা এই কৰুণ ঘটনাটো সংঘটিত হৈছে।
প্ৰাপ্ত খবৰ অনুসৰি, এই ভয়ংকৰ কাণ্ড সংঘটিত হোৱাৰ সময়ত ঘৰটোত আছিল শিশু আৰু মহিলাসহ ৯ জনীয়া এটা পৰিয়াল। পুৱা শুই থকা অৱস্থাত হঠাৎ ঘৰৰ মাটিৰ দেৱাল খহি পৰাৰ ফলত মাটিৰ তলত আৱদ্ধ হৈ পৰে ৯ জনীয়া পৰিয়ালটো।
এই ঘটনাত থিতাতে মৃত্যু হয় ৬ মহীয়া শিশু আৰু ৩৫ বছৰীয়া এজন লোকৰ। কৰুণ ঘটনাটোত মৃত্যু হোৱা দুয়োজন আছিল পিতা-পুত্ৰ। ইফালে আহত হয় পৰিয়ালৰ আন সদস্যসকল।
ঘটনা সংঘটিত হোৱাৰ পাছত স্থানীয় লোকসকলে ক্ষীপ্ৰতাৰে উদ্ধাৰ অভিযান আৰম্ভ কৰে। অৱশ্যে স্থানীয় লোকসকলে দুজনক জীৱন্তে উদ্ধাৰ কৰিবলৈ সক্ষম নহ’ল যদিও পৰিয়ালটোৰ আন সদস্যসকলৰ প্ৰাণ ৰক্ষা কৰিবলৈ সক্ষম হয়।
ইফালে ঘটনাৰ খবৰ লাভ কৰাৰ পিছতে ঘটনাস্থলত আৰক্ষী উপস্থিত হৈ মৃতদেহ দুটা উদ্ধাৰ কৰি মৰণোত্তৰ পৰীক্ষাৰ বাবে শিলচৰ মেডিকেল কলেজ হাস্পতাললৈ প্ৰেৰণ কৰে। ঘটনাক কেন্দ্ৰ কৰি অঞ্চলটোত তীব্ৰ চাঞ্চল্যৰ লগতে শোকাকুল পৰিৱেশে বিৰাজ কৰিছে।
