অৰুণাচল প্ৰদেশৰ চাংলাং জিলাৰ বৰডুমছাৰ জৱাহৰ নৱোদয় বিদ্যালয়ত এক ভয়াৱহ ৰেগিং কাণ্ড সংঘটিত হৈছে। মঙলবাৰে পুৱা বিদ্যালয়খনৰ ল’ৰা হোষ্টেলত জ্যেষ্ঠ ছাত্ৰ-ছাত্ৰীয়ে ১৫ জনতকৈ অধিক ছাত্ৰ-ছাত্ৰীক নৃশংসভাৱে আক্ৰমণ কৰাৰ অভিযোগ উত্থাপন হৈছে।
একাদশ শ্ৰেণীৰ ছাত্ৰ-ছাত্ৰীৰ এটা দলে বিদ্যালয়খনৰে অষ্টম শ্ৰেণীত অধ্যয়ণৰত কনিষ্ঠ শিক্ষাৰ্থীসকলক লক্ষ্য কৰি শাৰীৰিক আৰু মানসিকভাৱে আক্ৰমণ সংঘটিত কৰা বুলি জানিব পৰা গৈছে।
বৰ্ডিং স্কুলখনত ৫৩০ গৰাকী ছাত্ৰ-ছাত্ৰী আৰু ১৮ গৰাকী শিক্ষক আছে। ঘটনা সন্দৰ্ভত বিদ্যালয়ৰ অধ্যক্ষ ৰাজীৱ ৰঞ্জনে কয় যে বিদ্যালয় চৌহদত সংঘটিত হোৱা ভয়ানক ঘটনাৰ পিছত বৈঠকত মিলিত হোৱা অনুশাসন সমিতিৰ সিদ্ধান্ত অনুসৰি এতিয়ালৈকে ৫ গৰাকী ছাত্ৰ-ছাত্ৰীক নিলম্বন কৰা হৈছে।
শাৰীৰিক আৰু মানসিক উভয় অত্যাচাৰৰ সন্মুখীন হোৱা আহত ছাত্ৰ-ছাত্ৰীক প্ৰাথমিক চিকিৎসা প্ৰদান কৰা হৈছে বুলি উল্লেখ কৰি অধ্যক্ষগৰাকীয়ে লগতে এই বিষয়ত অধিক ব্যৱস্থা গ্ৰহণৰ বাবে বিদ্যালয়খনৰ অভিভাৱক শিক্ষক পৰিষদৰ এখন সভা আহ্বান কৰা হৈছে বুলিও অৱগত কৰে।
তেওঁ লগতে জনাইছে যে আজি পুৱা নিলম্বিত ছাত্ৰ-ছাত্ৰী কেইজনক অভিভাৱকৰ হাতত গতাই দিব কৰ্তৃপক্ষই।
ইফালে আঘাত প্ৰাপ্ত শিক্ষাৰ্থীসকলৰ অভিভাৱক সকলেও উচিত ন্যায়ৰ দাবী জনাইছে।
