পূব বাংগালুৰুৰ বাবু সাপল্যা অঞ্চলত বিগত কিছুদিনৰ পৰা হোৱা নেৰানেপেৰা বৰষুণৰ মাজতে ভাঙি পৰিল এটা নিৰ্মাণাধীন অট্টালিকা। ১৭ জন শ্ৰমিক অট্টালিকাৰ ধ্বংসাৱশেষৰ তলত আবদ্ধ হৈ আছে বুলি আশংকা প্ৰকাশ কৰা হৈছে।
আৰক্ষীয়ে জানিব দিয়া অনুসৰি, দুৰ্ঘটনাটোৰ পিছতে জৰুৰীকালীন আৰু অগ্নিনিৰ্বাপক বাহিনীৰ দুখন গাড়ীৰ লগতে এটা উদ্ধাৰকাৰী দল সেই স্থানত উপস্থিত হয়।
ঘটনাস্থলত উপস্থিত থকা এজন আৰক্ষী বিষয়াই জনোৱা মতে, সন্ধিয়া ধাৰাসাৰ বৰষুণৰ মাজতে অট্টালিকাটো ভাঙি পৰে। ইয়াৰ মাজতে ১৭ জন শ্ৰমিক আৱদ্ধ হৈ পৰাৰ সম্ভাৱনা আছে। অট্টালিকাটো ভাঙি পৰাৰ পিছতে অগ্নিকাণ্ড সংঘটিত হয়। দুৰ্ঘটনাটোৰ তথ্য লাভ কৰাৰ লগে লগে উদ্ধাৰৰ কাম আৰম্ভ কৰা হয়।
উল্লেখ্য যে, সোমবাৰে নিশাৰ পৰা হোৱা ধাৰাসাৰ বৰষুণৰ বাবে সমগ্ৰ বাংগালুৰু চহৰতে বানে ভয়ংকৰ পৰিস্থিতিৰ সৃষ্টি কৰিছে। পানী জমা হোৱাৰ বাবে বহু পথ বন্ধ হৈ থকাৰ বাবে প্ৰশাসনে পথত নাও মুকলি কৰি জনসাধাৰণক উদ্ধাৰ কৰিছে।
ইফালে, সোমবাৰে বাংগালুৰুত মুকলি মেনহ’লত পৰি এগৰাকী ৫৬ বছৰীয়া মহিলাৰ মৃত্যু হয়।
সংবাদ মাধ্যমৰ খবৰ অনুসৰি মঙলবাৰে পুৱালৈকে বাংগালুৰুৰ গ্ৰাম্য অঞ্চলত ১৭৬ মিলিমিটাৰ বৰষুণ হৈছে। আনহাতে বাংগালুৰু চহৰ অঞ্চলত ১৫৭ মিলিমিটাৰ বৰষুণ হৈছে।
আনহাতে ধাৰাসাৰ বৰষুণ আৰু পানী জমা হোৱাৰ বাবে মহানগৰীৰ বিদ্যালয়সমূহ সাময়িকভাৱে বন্ধ ৰখা হৈছে।