ৰাজ্যত এতিয়াও সুৰক্ষিত নহয় যুৱতী-মহিলা। এইবাৰ ই-ৰিক্সা চালকৰ কামনাৰ বলি হ’ল এগৰাকী ২৪ বছৰীয়া যুৱতী। এই ঘটনা সংঘটিত হৈছে ৰঙিয়াত।
ৰঙিয়াৰ পৰা নিজ গৃহলৈ গৈ থকা অৱস্থাত আন্ধাৰৰ সুযোগ লৈ এগৰাকী যুৱতীৰ সৈতে অপকৰ্ম চলোৱাৰ চেষ্টা চলাই ৰঙা ঘৰৰ আলহী হ’ল এগৰাকী ই-ৰিক্সা চালক।
ঘটনাৰ বিৱৰণী অনুসৰি যুৱতীগৰাকীয়ে ৰঙিয়াৰ কৰ্মস্থলীৰ পৰা নিজ গৃহ ইচ্চাদঘৰীয়ালৈ অকলশৰে গৈ থকাৰ সময়তে লম্পট ই-ৰিস্কা চালকজনে শাৰিৰীকভাৱে অপদস্থ কৰাৰ অভিযোগ উত্থাপন হৈছে।
জানিব পৰা অনুসৰি, প্ৰস্ৰাৱ কৰিব বুলি নিৰ্জন পথৰ দাঁতিত ই-ৰিক্সা ৰখাই পাছফালৰ পৰা মুখত গোবা মাৰি ধৰি যৌন আতিশায্য চলোৱাৰ অভিযোগ ধৃত চালক অনন্ত কলিতাৰ বিৰুদ্ধে।
ইতিমধ্যেই ৫৭ বছৰীয়া লম্পট অনন্ত কলিতাৰ বিৰুদ্ধে ভুক্তভোগী যুৱতীগৰাকীয়ে ৰঙিয়া থানাত এজাহাৰ দাখিল কৰে। যুৱতী গৰাকীৰ এজাহাৰৰ ভিত্তিত শুকুৰবাৰে ৰঙিয়া আৰক্ষীয়ে আটক কৰে চালক অনন্ত কলিতাক।
ইনপুট : ৰঙিয়াৰ পৰা তৃষ্ণা দাস
