অনিশ্চয়তাৰ খেল ক্ৰিকেট। এই খেলবিধ খেলি থকাৰ সময়তে এগৰাকী ক্ৰিকেটাৰৰ সৈতে সংঘটিত এক অনাকাংক্ষিত ঘটনাই ক্ৰীড়ানুৰাগীৰ মাজত যথেষ্ট শোকৰ ছাঁ পৰা পৰিলক্ষিত হৈছে।
জানিব পৰা অনুসৰি, এগৰাকী ৩৫ বছৰীয়া পেছাদাৰী ক্ৰিকেটাৰ ইমৰান পেটেলে ক্ৰিকেট খেলি থকাৰ সময়তে হৃদ ৰোগত আক্ৰান্ত হৈ মৃত্যুক আঁকোৱালি লয়। এই ঘটনা সংঘটিত হৈছে পুনেত।
বুধবাৰে পেটেলে নিজৰ দলৰ হৈ এখন লীগ মেচত অপেনিং কৰিবলৈ আহিছিল। মাত্ৰ কেইটামান অভাৰ খেলাৰ পিছতে তেওঁ বাঁও হাত আৰু বুকুত বিষ হোৱা বুলি আম্পায়াৰক জানিবলৈ দিয়ে।
আম্পায়াৰৰ সৈতে কিছুসময় কথা বতৰা পতাৰ পিছতেই তেওঁ পেভেলিয়ন অভিমুখে ৰাওনা হয় আৰু সেই সময়তে তেওঁ ঢলি পৰে। এই ঘটনা দেখি লগে লগে খেলপথাৰত থকা খেলুৱৈৰ লগতে তেওঁৰ সতীৰ্থসকলৰ মাজত হুৱদুৱা লাগে।
ইয়াৰ পিছত তেওঁ তাৎক্ষণিকভাৱে সমীপৱৰ্তী হাস্পতাললৈ লৈ যোৱা হয়, য’ত চিকিৎসকে তেওঁক মৃত ঘোষণা কৰে।
ক্ৰিকেটাৰ ইমৰান পেটেলৰ সতীৰ্থ নাছিৰ খানে কয় যে তেওঁৰ কোনো ধৰণৰ স্বাস্থ্যজনিত সমস্যা নাছিল। তেওঁ শাৰিৰীকভাৱে যথেষ্ট শক্তিশালী আছিল। ক্ৰিকেটৰ প্ৰতি তেওঁৰ অগাধ ভালপোৱা আছিল বুলিও সতীৰ্থ নাছিৰ খানে কয়।
উল্লেখ্য যে, এই মেচখন লাকি বিল্ডাৰ্ছ এণ্ড ডেভেলপমেণ্ট আৰু ইয়ং ইলেভেনৰ মাজত চলি আছিল। পেটেলে লাকি দলক নেতৃত্ব প্ৰদান কৰিছিল আৰু ইনিংছৰ ষষ্ঠ অভাৰত দুটা দৰ্শনীয় চাৰিও কোবাইছিল।
টাইমছ অৱ ইণ্ডিয়াৰ তথ্য অনুসৰি, পেটেল বিবাহিত আছিল আৰু তেওঁ তিনি কন্যা সন্তানৰ পিতৃ। তেওঁৰ কনিষ্ঠ কন্যা মাত্ৰ চাৰি মাহৰ বুলি জানিব পৰা গৈছে। ইমৰান পেটেলৰ আকস্মিক মৃত্যুত পৰিয়ালৰ লগতে তেওঁৰ সতীৰ্থসকলৰ মাজত গভীৰ শোকৰ ছাঁ পৰিছে।
