শুকুৰবাৰে জম্মু-কাশ্মীৰৰ পুঞ্চ জিলাৰ এল অ’ চিৰ সমীপত লেণ্ডমাইন বিস্ফোৰণত এজন অগ্নিবীৰ জোৱান নিহত হোৱাৰ লগতে আন দুজন জোৱান আহত হয়।
শীৰ্ষ বিষয়াই জানিব দিয়া অনুসৰি, নিৰাপত্তাৰক্ষীৰ দলটোৱে কৃষ্ণা ঘাটি অঞ্চলত টহল দি থকা সময়তে এটা লেণ্ডমাইন বিস্ফোৰণত এজন অগ্নিবীৰ জোৱান নিহত হোৱাৰ লগতে আন দুজন আহত হয়।
আহতসকলৰ ভিতৰত এজন জেচিঅ’, যিজনক সেনা হাস্পতালত ভৰ্তি কৰা হৈছে আৰু তেওঁ বৰ্তমান সুস্থিৰ বুলি বিষয়াসকলে জনায়।
হোৱাইট নাইট কৰ্পছে ‘এক্স’ৰ জৰিয়তে এটা পোষ্টত কয়, ‘কৃষ্ণা ঘাটি ব্ৰিগেডৰ অঞ্চলত টহল দি থকা অৱস্থাত লেণ্ডমাইন বিস্ফোৰণত সৰ্বোচ্চ বলিদান দিয়া ৭ জাট ৰেজিমেণ্টৰ অগ্নিবীৰ ললিত কুমাৰক শ্ৰদ্ধাঞ্জলি জনাইছো। আমি এই শোকৰ সময়ত শোকসন্তপ্ত পৰিয়ালটোৰ সৈতে আছো।’
ইফালে এই ঘটনাৰ দুখ প্ৰকাশ কৰি জম্মু-কাশ্মীৰৰ ৰাজ্যপাল মনোজ সিনহাই শ্বহীদ অগ্নিবীৰ ললিত কুমাৰক শ্ৰদ্ধাঞ্জলি জ্ঞাপন কৰে।
