দিল্লী বিধানসভা নিৰ্বাচনৰ প্ৰতি লক্ষ্য ৰাখি দেশৰ কেন্দ্ৰীয় গৃহমন্ত্ৰী অমিত শ্বাহে আজি কস্তুৰবা নগৰ বিধানসভা সমষ্টিত এখন বিশাল ৰোড শ্ব’ত অংশ লয়। এই ৰোড শ্ব’ৰ পিছতে অমিত শ্বাহে দিয়া এটা সাক্ষাৎকাৰত কয় যে বিগত ১০ বছৰত সাধাৰণ জনতাই সকলো কথা গম পালে, এইবাৰ দিল্লীত পৰিৱৰ্তন হ’ব।
সাক্ষাৎকাৰটোত তেওঁ কয়, এইবাৰ নিশ্চিতভাৱে পৰিৱৰ্তন হ’ব। মিছাৰ এটা আয়ুস থাকে, কিন্তু দিল্লীত এই মিছা বহুত দিন জীয়াই থাকিল। ১০ বছৰ পাৰ হৈ গ’ল, জনসাধাৰণে সকলো জানে আৰু এইবাৰ তেওঁলোকে এটা পৰিৱৰ্তন আনিবলৈ সাজু হৈছে।
বিজেপিয়ে আম আদমি পাৰ্টীৰ প্ৰতিশ্ৰুতি নকল কৰাৰ অভিযোগ সন্দৰ্ভত শ্বাহে কয় যে ইয়াত নকলৰ কোনো প্ৰশ্নই নুঠে। কিছু প্ৰতিশ্ৰুতি একে হ’ব পাৰে। অৱশ্যে তেওঁ এটাও প্ৰতিশ্ৰুতি পূৰ্ণ নকৰিলে। কিন্তু প্ৰধানমন্ত্ৰী নৰেন্দ্ৰ মোদীয়ে প্ৰতিটো প্ৰতিশ্ৰুতি প্ৰদান কৰিব।
দিল্লীত অলেখ দুৰ্নীতি হোৱা বুলি অভিযোগ তুলি শ্বাহে কয় যে আন্নাৰ নাম লৈ দুৰ্নীতিৰ বিৰুদ্ধে যুঁজ দি ৰাজনীতিলৈ আহিছিল অৰবিন্দ কেজৰিৱাল। কিন্তু শাসনত আহি তেওঁ নিজেই দুৰ্নীতিত লিপ্ত হ’ল।
শ্বাহে লগতে এইবাৰৰ নিৰ্বাচনত শাসনাধিষ্ঠ আম আদমি পাৰ্টিয়ে শোচনীয়ভাৱে পৰাস্ত হ’ব বুলিও মন্তব্য কৰে।
উল্লেখ্য যে, ৭০খন আসনযুক্ত দিল্লী বিধানসভাৰ নিৰ্বাচনৰ ভোটগ্ৰহণ অহা ৫ ফেব্ৰুৱাৰীত অনুষ্ঠিত হ’ব। এটা পৰ্যায়তে অনুষ্ঠিত হ’বলগীয়া নিৰ্বাচনৰ ভোটগণনা হ’ব ৮ ফেব্ৰুৱাৰীত।
