প্ৰধানমন্ত্ৰী নৰেদ্ৰ মোদীৰ পিছত এইবাৰ পাকিস্তানক কঠোৰ ভাষাৰে সকীয়াই দিছে কেন্দ্ৰীয় গৃহমন্ত্ৰী অমিত শ্বাহে। সীমান্ত সুৰক্ষা বাহিনী চমুকৈ বিএছএফৰ এক অনুষ্ঠানত অংশ লৈ গৃহমন্ত্ৰী অমিত শ্বাহে ভাৰতীয় সেনাৰ পৰাক্ৰমৰ কথা উল্লেখ কৰে।
তেওঁ কয় যে নিৰাপত্তাৰ দিশত ভাৰতৰ কৌশল সলনি হৈছে। কাৰণ শত্ৰুক প্ৰত্যুত্তৰ দিয়াৰ ক্ষেত্ৰত ভাৰতে নিজৰ পুৰণি কৌশল সলনি কৰিছে। পূৰ্বৰ ৰক্ষণাত্মক স্থিতি এৰি এতিয়া ভাৰত হৈছে আক্ৰণণাত্মক।
উৰি আক্ৰমণৰ পিছত ভাৰতে কৰা চাৰ্জিকেল ষ্ট্ৰাইক ইয়াৰ উদাহাৰণ বুলি উল্লেখ কৰে গৃহমন্ত্ৰী শ্বাহে। এই প্ৰসংগতে তেওঁ শেহতীয়া অপাৰেশ্যন সেন্দূৰৰ সাফল্যৰ কথা বৰ্ণনা কৰি ভাৰতীয় সেনা-বিএছএফ আৰু আৰক্ষীৰ পৰাক্ৰমক ভূয়সী প্ৰসংসা কৰে।
‘১০০ কিলোমিটাৰ ভিতৰলৈ প্ৰৱেশ কৰি পাকিস্তানক দিয়া শিক্ষা’ৰ কথাও উল্লেখ কৰি গৃহমন্ত্ৰী শ্বাহে পুলৱামা কাণ্ডৰ পিছত ভাৰতে দিয়া প্ৰত্যুত্তৰৰ কথাও প্ৰসংগক্ৰমে উল্লেখ কৰে।
ইয়াৰ উপৰি বাংলাদেশক উদ্দেশ্যিও কঠোৰ বাৰ্তা প্ৰদান কৰে গৃহমন্ত্ৰী অমিত শ্বাহে। শ্বাহে কয় যে বাংলাদেশে পাহৰি যাব নালাগে যে তেওঁলোকক স্বাধীন কৰাৰ সময়ত বি এছ এফে কি ভূমিকা গ্ৰহণ কৰিছিল। বাংলাদেশ গঠনত বি এছ এফৰ ভূমিকা অতুলনীয় আছিল আৰু সেই কথা বাংলাদেশে পাহৰি যাব নালাগে।
উল্লেখযোগ্য প্ৰধানমন্ত্ৰী মোদীয়ে শেহতীয়াকৈ বৃহস্পতিবাৰে ৰাজস্থানৰ এক অনুষ্ঠানত অংশ লৈ ‘অপাৰেশ্যন সেন্দূৰ’ক ‘ভাৰতীয় ন্যায়ৰ নতুন মুখ’ বুলি অভিহিত কৰিছিল।
