ভাৰতীয় জনতা পাৰ্টি চমুকৈ বিজেপিয়ে ঝাৰখণ্ড বিধানসভা নিৰ্বাচনৰ বাবে প্ৰকাশ কৰিলে ইস্তাহাৰ। এই ইস্তাহাৰৰ নাম দিয়া হৈছে সংকল্প পাত্ৰ। দীপাৱলী আৰু ৰাখী বন্ধনৰ সময়ত এটাকৈ গেছ চিলিণ্ডাৰ বিনামূলীয়াকৈ দিয়া হ’ব বুলি প্ৰতিশ্ৰুতি প্ৰদান কৰে।
কেন্দ্ৰীয় গৃহমন্ত্ৰী অমিত শ্বাহে দেওবাৰে ৰাঁচীত ঝাৰখণ্ড নিৰ্বাচনৰ বাবে ভাৰতীয় জনতা পাৰ্টিৰ সংকল্প পত্ৰ প্ৰকাশ কৰে। এই সময়ত অসমৰ মুখ্যমন্ত্ৰী হিমন্ত বিশ্ব শৰ্মা, কেন্দ্ৰীয় মন্ত্ৰী শিৱৰাজ সিং চৌহান, সঞ্জয় ছেঠ আৰু বিজেপি ঝাৰখণ্ডৰ সভাপতি বাবুলাল মাৰাণ্ডী উপস্থিত থাকে।
ইস্তাহাৰ প্ৰকাশ কৰি অমিত শ্বাহে কয় যে ঝাৰখণ্ডৰ এই নিৰ্বাচন কেৱল চৰকাৰ সলনিৰ নিৰ্বাচন নহয়, ঝাৰখণ্ডৰ ভৱিষ্যত সুনিশ্চিত কৰাৰ নিৰ্বাচন।
গৃহমন্ত্ৰী শ্বাহে লগতে কয় যে, ঝাৰখণ্ডৰ জনতাই দুৰ্নীতিৰে ভৰা চৰকাৰ বিচাৰে নে প্ৰধানমন্ত্ৰী মোদীৰ নেতৃত্বত উন্নয়নৰ পথত আগবঢ়া বিজেপি চৰকাৰ বিচাৰে সেয়া তেওঁলোকে সিদ্ধান্ত ল’ব লাগিব।
‘অনুপ্ৰৱেশৰ অনুমতি দি ঝাৰখণ্ডৰ পৰিচয়, মাটি আৰু নাৰীক বিপদত পেলোৱা চৰকাৰ বিচাৰে নে সীমান্ত ৰক্ষা কৰা ভাৰতীয় জনতা পাৰ্টিৰ চৰকাৰ বিচাৰে’, এইদৰে কয় শ্বাহে।
সংকল্প পত্ৰ প্ৰকাশ কৰি কেন্দ্ৰীয় গৃহমন্ত্ৰীগৰাকীয়ে কয়, ‘বিজেপি সকলো দলতকৈ পৃথক। কাৰণ দেশৰ ৰাজনীতিত বিজেপি একমাত্ৰ দল যিয়ে যি কয় তাকেই কৰি দেখুৱাই। বিজেপি ক্ষমতাত অহা মানেই সকলো সংকল্প পূৰণ হোৱা।
উল্লেখ্য যে, ঝাৰখণ্ডত দুটা পৰ্যায়ত অনুষ্ঠিত হ’ব বিধানসভা নিৰ্বাচনৰ ভোটগ্ৰহণ। অহা ১৩ নৱেম্বৰ আৰু ২০ নৱেম্বৰত ভোটগ্ৰহণ অনুষ্ঠিত হ’ব। ২৩ নৱেম্বৰত ঘোষণা কৰা হ’ব ফলাফল।
