আজি দুপৰীয়া ১.৩৮ বজাত গুজৰাটৰ আহমেদাবাদত সংঘটিত হোৱা ভয়ংকৰ বিমান দুৰ্ঘটনাৰ কিছু নতুন তথ্য পোহৰলৈ আহিছে। দুৰ্ঘটনাত পতিত হোৱা বিমানখনত আছিল ১৬৯ গৰাকী ভাৰতীয় যাত্ৰী। ইয়াৰ উপৰি ৫৩ গৰাকী ব্ৰিটিছ, এজন কানাডাৰ আৰু এজন পৰ্তুগালৰ যাত্ৰী আছিল বুলি জানিব পৰা গৈছে।
বৰ্তমান আহমেদাবাদৰ বিমান দুৰ্ঘটনাস্থলীত অব্যাহত আছে সাহায্য আৰু উদ্ধাৰ অভিযান। কেন্দ্ৰীয় গৃহমন্ত্ৰী অমিত শ্বাহে গুজৰাটৰ মুখ্যমন্ত্ৰীৰ সৈতে বাৰ্তালাপ কৰি কেন্দ্ৰৰ তৰফৰ পৰা সকলো প্ৰকাৰৰ সাহায্য আগবঢ়োৱাৰ প্ৰতিশ্ৰুতি প্ৰদান কৰিছে।
ইফালে প্ৰধানমন্ত্ৰী নৰেন্দ্ৰ মোদীয়ে গৃহ মন্ত্ৰী অমিত শ্বাহ আৰু অসামৰিক বিমান পৰিবহন মন্ত্ৰী ৰাম মোহন নায়ডুৰ সৈতে ফোনযোগে দুৰ্ঘটনা সন্দৰ্ভত বাৰ্তালাপ কৰে। দুয়োজন কেন্দ্ৰীয় মন্ত্ৰীকে আহমেদাবাদলৈ গৈ পৰিস্থিতিৰ বুজ ল’বলৈ নিৰ্দেশ প্ৰদান কৰে প্ৰধানমন্ত্ৰী মোদীয়ে।
প্ৰধানমন্ত্ৰীৰ নিৰ্দেশৰ পিছতেই আহমেদাবাদলৈ ৰাওনা হৈছে গৃহমন্ত্ৰী অমিত শ্বাহ।
এয়াৰ ইণ্ডিয়াৰ অধ্যক্ষ এন চন্দ্ৰশেখৰনে কয় যে, ‘অতি দুখেৰে জনাও যে, আজি আহমেদাবাদৰ পৰা লণ্ডন গেটৱিকলৈ উৰা মৰা এয়াৰ ইণ্ডিয়াৰ ১৭১ বিমানখন দুৰ্ঘটনাগ্ৰস্ত হয়। এই ভয়াৱহ কাণ্ডৰ ফলত ক্ষতিগ্ৰস্ত হোৱা সকলোৰে পৰিয়াল আৰু আপোনজনৰ সৈতে আমি আছো।’
উল্লেখ্য যে, এয়াৰ ইণ্ডিয়াৰ এই বিমানখনে উৰণৰ কিছু সময় পিছতেই নিয়ন্ত্ৰণ হেৰুৱাই বিমানবন্দৰৰ পৰা কিছু নিলগত দুৰ্ঘটনাত পতিত হয়। দুৰ্ঘটনাগ্ৰস্ত বিমানখনত আছিল গুজৰাটৰ প্ৰাক্তন মুখ্যমন্ত্ৰী বিজয় ৰূপানী।
অৱশ্যে চৰকাৰ তথা প্ৰশাসনৰ তৰফৰ পৰা এই পৰ্যন্ত দুৰ্ঘটনাটোত কিমান লোকৰ প্ৰাণ গৈছে সেই কথা এই পৰ্যন্ত প্ৰকাশ কৰা হোৱা নাই।
