ভাৰতীয় ক্ৰিকেট দলৰ জাৰ্চী স্পনছৰ কোন হ’ব তাক লৈ চলি থকা জল্পনা-কল্পনাৰ অন্ত পৰিল। এতিয়াৰে পৰা আনুষ্ঠানিকভাৱে ভাৰতীয় দলৰ নতুন জাৰ্চীৰ স্পনছৰ হ’ব এপ’ল’ টায়াৰ।
এছিয়া কাপ আৰম্ভ হোৱাৰ পূৰ্বে ভাৰতীয় ক্ৰিকেট নিয়ন্ত্ৰণ ব’ৰ্ড চমুকৈ বিচিচিআইয়ে ড্ৰীম ইলেভেনৰ সৈতে থকা স্পনছৰৰ চুক্তি বাতিল কৰিছিল। ইয়াৰ পিছৰে পৰা নতুন স্পনছৰৰ বাবে বিচাৰ-খোচাৰ আৰম্ভ হৈছিল।
জানিব পৰা অনুসৰি, ভাৰতীয় ক্ৰিকেট দলৰ নতুন জাৰ্চীৰ স্পনছ’ৰ এপ’ল’ টায়াৰে পূৰ্বে স্পনছৰ কৰা কোম্পানীসমূহৰ তুলনাত অধিক ধন প্ৰদান কৰিব বিচিচিআইক।
উল্লেখ্য যে, ড্ৰীম ইলেভেনৰ সৈতে ৩৫৮ কোটি টকাত তিনিবছৰৰ বাবে স্পনছৰৰ চুক্তি হৈছিল। শেহতীয়াকৈ চৰকাৰে অনা নতুন আইনৰ বাবে বিচিচিআইয়ে ড্ৰীম ইলেভেনৰ সৈতে থকা চুক্তি বাতিল কৰিবলৈ বাধ্য হয়। ইয়াৰ পিছতে বিচিচিআইয়ে নিবিদা জাৰী কৰে। আৰু সেই অনুসৰি আজি অনুষ্ঠিত হোৱা নিবিদা প্ৰক্ৰিয়াত এপ’ল’ টায়াৰে স্পনছৰশ্বিপ লাভ কৰে।
বিভিন্ন ৰাষ্ট্ৰীয় সংবাদ মাধ্যমত প্ৰকাশিত বাতৰি অনুসৰি, এপ’ল’ টায়াৰ্ছে প্ৰতিখন মেচৰ বাবে বিচিচিআইক প্ৰদান কৰিব ৪.৫ কোটি টকা। ইয়াৰ পূৰ্বে ড্ৰীম ইলেভেনে প্ৰথন মেচৰ বাবদ দিছিল ৪ কোটি টকা। অৰ্থাত পূৰ্বৰ তুলনাত এইবাৰ অধিক হাৰত বিচিচিআইয়ে লাভ কৰিব ধন।
এপ’ল’ টায়াৰৰ সৈতে হোৱা চুক্তি ২০২৭ চনলৈ থাকিব। এই সময়ছোৱাত ভাৰতীয় দলটোৱে খেলিব প্ৰায় ১৩০ খন মেচ। এতিয়াৰে পৰা ভাৰতীয় ক্ৰিকেট দলৰ জাৰ্চীত দেখা পোৱা যাব এপ’ল’ টায়াৰৰ লগ’।
