গুৱাহাটী মহানগৰীৰ পৰা প্ৰায় ৮৫ কিলোমিটাৰ দূৰৈত বজালী জিলাৰ জালিখাটা অঞ্চলত আছে এছিয়া মহাদেশৰ দ্বিতীয় বৃহত্তম লগতে উত্তৰ পূৰ্বাঞ্চলৰ সৰ্ববৃহৎ বৰগছ জোপা। এই গছ জোপাই নিজৰ বিভিন্ন ঠাল-ঠেঙুলীৰে প্ৰায় এবিঘা মাটি আগুৰি আছে।
জালিখাটাস্থিত কলিবাৰীৰ শ্ৰীশ্ৰী শিৱথানত পাঁচ বিঘা মাটিৰে আগুৰি আছে গছজোপা। এই গছজোপাই সৌন্দৰ্যবৰ্ধনৰ লগতে চৰাই-চিৰিকটিৰ কলৰৱে সেই স্থান প্ৰাণৱন্ত কৰি তুলিছে।
এই বট গছ বা বৰ গছজোপাৰ বৈজ্ঞানিক নাম হৈছে Ficus benghalensis । এই গছ Ficus গোত্ৰৰ অন্তৰ্ভুক্ত। বট এবিধ বৃহৎ আকাৰৰ বৃক্ষ জাতীয় উদ্ভিদ। বট গছ বহু ঠাই আগুৰি থকাৰ লগতে মাটিৰ ওপৰত সমান্তৰাল ভাবে শাখা প্ৰশাখা সমূহ বিস্তাৰিত হৈ আছে।
১৯৩৪ চনত এই গছ ডালৰ ওচৰত এটি শিৱ মন্দিৰ স্থাপন কৰা হৈছিল। জনশ্ৰুতি অনুসৰি, এই গছডালৰ ওচৰত থকা শিৱ মন্দিৰত সেৱা কৰিলে মনোবাঞ্চা পূৰ্ণ হয়। বিভিন্ন স্থানৰ পৰা এই থানলৈ অহা ভক্তসকলে এই গছৰ ডালত গামোচা বান্ধে। ভক্তসকলৰ বিশ্বাস যে, ইয়াত গামোচা বান্ধিলে ভগবানে তেওঁৰ সকলো মনোবাঞ্ছা পূৰণ কৰে। এছিয়াৰ দ্বিতীয় এই গছডালৰ বয়স প্ৰায় ২১৩ বছৰ বুলি স্থানীয় লোকসকলে উল্লেখ কৰিছে।
এছিয়াৰ দ্বিতীয় এই গছডালৰ বয়স আচলতে কিমান সেয়া কোনেও ভালকৈ নাজানে। যদিও ২০২০ চনৰ ৫ জুন তাৰিখে ৬০ কেজি ওজনৰ কেক কাটি গছ ডালৰ আনুমানিক ২০৮ বছৰীয়া জন্মদিন উদযাপন কৰা হয়। বহু সংখ্যক উদ্ভিদ বিদ বা উদ্ভিদ বিশেজ্ঞই অবশ্যে গছডালৰ বয়স ৩০০ বছৰতকৈও অধিক বুলি কব খোজে।
নৱবৰ্ষৰ প্ৰথম দিনাৰ লগতে শিৱ পূজা, ব’হাগ বিহু আদিত ইয়াত যথেষ্ট সংখ্যক দৰ্শনাৰ্থীয়ে ভিৰ কৰেহি। এই মন্দিৰ তথা গছজোপাৰ তলতে শিৱ চতুৰ্দশীৰ দিনা শিৱ পূজা অনুষ্ঠিত কৰা হয়। শিৱ পূজাৰ লগত সংগতি ৰাখি মেলাও অনুষ্ঠিত কৰা হয় জালিখাটাত।
ব’হাগ বিহুত এই মন্দিৰ প্ৰাংগণত অনুষ্ঠিত হয় ভঠেলি উৎসৱ। ভঠেলি উৎসৱত জালিখাটা গাঁওখনৰ প্ৰতিটো চুপাৰ পৰা এডালকৈ বাঁহ আনি মন্দিৰ প্ৰাংগণত পুতি তাত পূজা–অৰ্চনা কৰে ভক্তপ্ৰাণ ৰাইজে। বটবৃক্ষৰ ওচৰৰে বৈ যোৱা কালদিয়া নৈ আৰু গছজোপাৰ সৌন্দৰ্যই আকৰ্ষণ কৰে বিভিন্ন প্ৰকৃতি প্ৰেমীৰ লগতে বনভোজৰ দলসমূহকও।
