ধুবুৰী চহৰত সৃষ্টি হৈছে এক উত্তপ্ত পৰিস্থিতি। ব্যৱসায়ী আৰু ৰাইজৰ হৈছে উত্তাল প্ৰতিবাদ। কেইবাঘণ্টা ধৰি বন্ধ হৈ থাকে বজাৰৰ দোকান-পোহাৰ।
বজাৰ বন্ধ কৰি ধুবুৰী পৌৰসভাৰ বিৰুদ্ধে ব্যৱসায়ী সকলৰ উত্তাল প্ৰতিবাদ। ধুবুৰীৰ চ’ক বজাৰত সৃষ্টি হৈছে এই পৰিস্থিতি। হাজাৰ হাজাৰ ব্যৱসায়ী ক্ষোভিত হৈ পৰিছে ধুবুৰী পৌৰসভাৰ বিৰুদ্ধে। বজাৰৰ দোকান-পোহাৰ বন্ধ কৰি ৰাজপথলৈ ওলাই আহিল ব্যৱসায়ী।
উল্লেখ্য যে, ঈদ আৰু হোলীৰ পুৰ্বে বজাৰৰ পদপথ মুক্ত কৰাৰ বাবে ধুবুৰী পৌৰসভাই উচ্ছেদৰ জাননী দিয়াক কেন্দ্ৰ কৰিয়েই সৃষ্টি হয় এনে উত্তপ্ত পৰিস্থিতিৰ।
পদপথৰ দোকনীক উচ্ছেদ কৰাৰ লগতে একাংশ প্ৰতিষ্ঠিত ব্যৱসায়ীক একাধিক নিয়ম-নীতি বান্ধি দিয়াক কেন্দ্ৰ কৰি ধুবুৰী বজাৰত সৃষ্টি হৈছে এই ঘটনা। দৰাচলতে, ধুবুৰী চহৰত সঘনাই যান-জঁটৰ সৃষ্টি হোৱাৰ ফলতেই পদপথৰ দোকানসমূহ উচ্ছেদৰ বাবে জাননী জাৰি কৰিছিল পৌৰসভাই।
পিছে প্রকৃততে ধুবুৰী পৌৰসভাই যধে-মধে হাজাৰ হাজাৰ ই-ৰিক্সা চলাচলৰ অনুমতি দিয়াৰ ফলতেই চহৰ খনত সৃষ্টি হৈছে এই তীব্র যান-জঁটৰ। যাৰ ফলত ধুবুৰী পৌৰসভাৰ বিৰুদ্ধে ক্ষোভিত হৈ পৰে স্থানীয় ৰাইজৰ লগতে হাজাৰ হাজাৰ ব্যৱসায়ী।
ইফালে ঘটনাস্থলীত উপস্থিত হৈ আৰক্ষী আৰু দণ্ডাধীশে উক্ত পৰিস্থিতি নিয়ন্ত্ৰণৰ চেষ্টা চলায়৷ বৰ্তমান সাময়িকভাৱে সকলো উচ্ছেদ প্ৰক্ৰিয়া বন্ধ ৰাখি ঈদৰ পিছত সিদ্ধান্ত লোৱা হ’ব বুলি দণ্ডাধীশে আশ্বাস দিয়াৰ পিছতহে নিয়ন্ত্ৰণলৈ আহে পৰিস্থিতি।
