ৰাজ্যত সংঘটিত হৈছে এক চাঞ্চল্যকৰ ঘটনা। জোঁৱায়েকে কৰা আক্ৰমণত আঘাতপ্ৰাপ্ত শাহুৱেক আৰু খুলশালী।
এই ঘটনা সংঘটিত হৈছে চামগুৰিৰ গেৰুৱামুখত। চামগুৰিৰ এজন যুৱকে আক্ৰমণ কৰি শাহুৱেক আৰু খুলশালীক আক্ৰমণ কৰাৰ অভিযোগ উত্থাপন হয়। খবৰ অনুসৰি, ছমাহ পূৰ্বে অগ্নিনিৰ্বাপক বাহিনীত কৰ্মৰত তামুলপুৰৰ যুৱক প্ৰণৱ ৰাজবংশীয়ে চামগুৰিৰ গেৰুৱামুখৰ এগৰাকী যুৱতীৰ সৈতে আইনগতভাৱে বিবাহ পাশত আবদ্ধ হয়।
বিবাহৰ পিছত দুয়ো একেলগে গুৱাহাটীৰ এটা ভাড়াঘৰত আছিল যদিও লাহে লাহে দুয়োৰে মাজত সৃষ্টি হৈছিল তীব্ৰ কাজিয়াৰ। পৰৱৰ্তী সময়ত পত্নীয়ে মাতৃৰ গৃহলৈ উভতি আহে। পিছে মাতৃ গৃহলৈ আহি স্বামীৰ অজ্ঞাতে শ্বিলং ফুৰিবলৈ যোৱাটোৱে পুনৰ দুয়োৰে মাজত কাজিয়াৰ সৃষ্টি কৰে।শেষলৈ এই কাজিয়াৰ ফলতে আঘাতপ্ৰাপ্ত হয় পত্নীৰ মাতৃ আৰু ভাতৃ।
প্ৰনৱ ৰাজবংশীৰ ভাষ্য অনুসৰি, পত্নীক বিচাৰি মাতৃৰ গৃহত উপস্থিত হোৱাৰ পিছতে পত্নীক বিচাৰি নাপাই নিজকে দাৰে শেষ কৰিব লওঁতেই শাহুৱেকে বাধা দিয়ে। সেই টনা-আজোৰাত আঘাতপ্ৰাপ্ত হয় শাহুৱেক আৰু খুলশালী।
ইফালে শাহুৱেকৰ অভিযোগ অনুসৰি, প্ৰনৱ ৰাজবংশীৰ পূৰ্বতে আছে এগৰাকী পত্নী থকাৰ লগতে দুটা সন্তানো আছে। প্ৰথমা পত্নী থকাৰ পাছতো মিছা প্ৰলোভনেৰে আইনিগত ভাৱে দ্বিতীয় বিবাহ কৰোৱাৰ অভিযোগ উত্থাপন কৰে শাহুৱেকে।
ঘটনাস্থলীত চামগুৰি আৰক্ষী উপস্থিত হৈ আটক কৰে প্ৰনৱ ৰাজবংশীক। ইতিমধ্যে আৰক্ষীয়ে আৰম্ভ কৰিছে প্ৰাৰম্ভিক তদন্ত।
