নিশা বাক্সাত সৃষ্টি হৈছে এক উত্তপ্ত পৰিস্থিতিৰ। নাৰীসৰবৰাহক কেন্দ্ৰ কৰি গাঁৱখনত এই পৰিস্থিতিৰ সৃষ্টি হয়।
বাক্সা জিলাৰ আনন্দপুৰত সংঘটিত হৈছে এই ঘটনা। ৰাজস্থানলৈ নাৰীসৰবৰাহ কৰাক কেন্দ্ৰ কৰি গাঁৱখনত উত্তপ্ত পৰিস্থিতিৰ সৃষ্টি হয়। জিলাখনৰ বৰবৰী আৰক্ষী থানাৰ অন্তৰ্গত গাঁৱত আৰক্ষী উপস্থিত হৈ নিয়ন্ত্ৰণ কৰে পৰিস্থিতি।
ইতিমধ্যে ঘটনাস্থলীত আৰক্ষী উপস্থিত হৈ নাৰীসৰবৰাহৰ লগত জড়িত এগৰাকী মহিলাক আটক কৰে। উল্লেখ্য যে, প্ৰায় ১৭ বছৰ পূৰ্বে গাঁৱখনৰ এগৰাকী মহিলাৰ বিবাহ হৈছিল ৰাজস্থানৰ ৰাজেশ স্বামী নামৰ এজন ব্যক্তিৰ লগত। তেতিয়াৰে পৰা মহিলাগৰাকী আৰু ৰাজেশ আনন্দপুৰ গাঁৱলৈ আহি আৰম্ভ কৰিছিল নাৰী সৰবৰাহৰ কাম। এমাহ-দুমাহলৈ গাঁওখনত বাহৰ পাতি গাঁৱৰে সনাতন ৰাজবংশী নামৰ এগৰাকী যুৱকৰ সৈতে মিলি ৰাজস্থানলৈ সৰবৰাহ কৰি আহিছে মহিলা কিম্বা যুৱতী।
শেহতীয়াভাৱে ৰাজেশ আৰু তেওঁৰ পত্নীয়ে প্ৰায় এমাহ ধৰি সনাতন ৰাজবংশীৰ ঘৰত বাহৰ পাতি আছে। কিন্তু মংগলবাৰে নিশা তেওঁলোকৰ মাজত হোৱা এক মাৰপিটৰ ঘটনাৰ পিচতে পোহৰলৈ আহে নাৰী সৰবৰাহৰ এই ঘটনা।
কিয়নো বিগত সাত বছৰ পূৰ্বে গাঁৱখনৰে এগৰাকী যুৱতীক লৈ গৈছিল ৰাজস্থানৰ জুন জুনু জিলালৈ আৰু তাতে ধনৰ বিনিময়ত অনিল চেইন নামৰ ব্যক্তিজনক গতাই দিছিল এই যুৱতীগৰাকীক।
এই ঘটনাৰ বাবে নিশা সমগ্ৰ গাঁৱখনতে এক উত্তেজনাময় পৰিৱেশৰ সৃষ্টি হয়। ৰাইজে নাৰীসৰবৰাহৰ লগত জড়িত ৰাজেশ আৰু তেওঁৰ পত্নীক গ্ৰেপ্তাৰ কৰাৰ বাবে দাবী উত্থাপন কৰে। পিচত আৰক্ষীয়ে দুয়োকে নিশাই বৰবৰী থানালৈ নি তদন্ত আৰম্ভ কৰে।
