গোলাঘাট জিলা প্ৰশাসন আৰু অসম আৰক্ষীৰ সহযোগত উৰিয়ামঘাট ৰেংমা সংৰক্ষিত বনাঞ্চলত চলিছে উচ্ছেদ অভিযান। বৰ্তমানেও অব্যাহত আছে উচ্ছেদ অভিযান। আজি এই উচ্ছেদৰ তৃতীয়টো দিন। প্ৰায় ১১০০০ বিঘা ভূমি বেদখল মুক্ত কৰাৰ উদ্দেশ্যে এই উচ্ছেদ অভিযান আৰম্ভ কৰা হৈছে।
উচ্ছেদৰ প্ৰথমটো দিনত বিদ্যাপুৰৰ ১৩০ টা অবৈধ ব্যবসায় প্ৰতিষ্ঠান উচ্ছেদ কৰে বন বিভাগে। ৰেংমা বনাঞ্চলৰ ৪.২ হেক্টৰ ভূমি বেদখল মুক্ত কৰে প্ৰশাসনে।
দ্বিতীয়টো দিনত উৰিয়ামঘাট ৰেংমা বনাঞ্চল পিঠাঘাট আৰু সোনিৰীবিলত উচ্ছেদ অভিযান চলায় প্ৰশাসনে। পিঠাঘাটত ১৮০টা আৰু সোনালী বিলত ৯৮টা বাসগৃহ আৰু ব্যবসায়ী প্ৰতিষ্ঠান উচ্ছেদ কৰা হয়। পিঠাঘাটত থকা পুৰণি জামে মছজিদ এটাও উচ্ছেদ কৰে চৰকাৰে।
আজি উচ্ছেদৰ তৃতীয়টো দিন। আজি ২নং দয়ালপুৰ ,৩ নং দয়ালপুৰ, ৩ নং দলনিপথাৰ, খেৰবাৰী আৰু আনন্দপুৰত উচ্ছেদ চলিব। বৰ্তমান লৈকে কোনোধৰণৰ অপ্ৰীতিকৰ পৰিবেশৰ সৃষ্টি হোৱা নাই এই উচ্ছেদ অভিযানত।
ৰেংমা বনাঞ্চলৰ প্ৰায় ৭০ টা পৰিয়ালে সময়সীমা বৃদ্ধিৰ বাবে আবেদন কৰিছিল উচ্চতম ন্যায়ালয়ত। সেই পৰিয়ালসমূহৰ ৭ দিনৰ সময়সীমা প্ৰশাসনে বৃদ্ধি কৰিছে বুলি জানিব পৰা গৈছে অৰ্থাৎ ৭ দিনৰ ভিতৰত তেওঁলোকে এই গৃহ খালী কৰিব। ইয়াৰ পিছতেই উচ্ছেদ চলাব বুলি বন বিভাগৰ বিশেষ সচিবে জানিবলৈ দিয়ে।
