অসমৰ হিমন্ত বিশ্ব শৰ্মা চৰকাৰে লৈছে এটা ডাঙৰ সিদ্ধান্ত। সমগ্ৰ ৰাজ্যতে বিশেষ মাংস নিষিদ্ধ কৰিছে অসম চৰকাৰে। অসমৰ হোটেল, ৰেষ্টুৰেণ্ট আৰু ৰাজহুৱা স্থানত বিশেষ মাংস বিক্ৰী আৰু ক্ৰয়ৰ ওপৰত নিষেধাজ্ঞা আৰোপ কৰা হৈছে।
এতিয়া অসমৰ পিছত বিহাৰতো নিষিদ্ধ হ’ব নেকি বিশেষ মাংস? এই প্ৰশ্নৰ কাৰণ হ’ল অসম চৰকাৰৰ এই সিদ্ধান্তক আদৰণি জনাইছে নীতিশ চৰকাৰে। এই বিষয়ত এন ডি এত বৃদ্ধি পাইছে উত্তেজনা। জেডিইউ আৰু বিজেপি দুয়োটা দলকে মুখামুখিকৈ দেখা গৈছে।
বিহাৰত বিশেষ মাংস নিষিদ্ধ কৰিবলৈ দাবী জনাইছে বিজেপিৰ বিধায়ক হৰিভূষণ ঠাকুৰ বাচৌলে। অসম চৰকাৰৰ এই সিদ্ধান্ত তেওঁও আদৰণি জনাইছে। শুকুৰবাৰে অৰ্থাৎ ০৬ ডিচেম্বৰত এক সাক্ষাৎকাৰত বাচৌলে কয় যে, অসমত হিন্দু সম্প্ৰদায়ৰ ৰাইজৰ বিশ্বাসক সন্মান জনোৱা হৈছে। বিহাৰৰ কোটি কোটি লোকেও গো-মাতাক পূজা কৰে। তেওঁৰ হত্যা কোনো কাৰণতে ন্যায্য নহয়।
বাচৌলে লগতে ইয়াকো কয় যে, বিহাৰতো যিয়ে বিশেষ মাংস বিক্ৰী কৰে তেওঁক আটাইতকৈ কঠোৰ শাস্তি দিয়া উচিত। বিশ্বাসৰ সৈতে খেলা-ধূলা কৰাৰ অধিকাৰ কাৰো নাই। ইয়াৰ ফলত সমাজত উত্তেজনাহে বিয়পিব। বিহাৰত পশুধন সুৰক্ষা আইন ১৯৫৬ আছে, কিন্তু ইয়াক পালন কৰা নহয়।
পিছে এই সন্দৰ্ভত জেডিইউৰ এমএলচি খালিদ আনোৱাৰে এক ডাঙৰ বিবৃতি দিছে। খালিদ আনোৱাৰে কয় যে, অসমৰ মুখ্যমন্ত্ৰী হিমন্ত বিশ্ব শৰ্মাৰ চিন্তাধাৰা নেতিবাচক। বিশেষ মাংস নিষিদ্ধ কৰাটো এন ডি এৰ এজেণ্ডা নহয়। অসমত মুছলমান আৰু খ্ৰীষ্টান ধৰ্মাৱলম্বী লোকৰো খাদ্যাভ্যাস একে। সেই মানুহবোৰে এতিয়া কি কৰিব? গতিকে অসম চৰকাৰৰ এই সিদ্ধান্ত সঠিক নহয়। পিছে বিহাৰত বিশেষ মাংস নিষিদ্ধ নহয়।
খালিদ আনোৱাৰে কয় যে, বিহাৰ বিজেপিত এনে কিছুমান লোক আছে, যাৰ চিন্তাধাৰা অসমৰ মুখ্যমন্ত্ৰীৰ দৰে একেই। একেখিনি মানুহেই বিহাৰতো নিষেধাজ্ঞাৰ দাবী জনাইছে। বিহাৰত তেওঁলোকে ১৯ বছৰে চৰকাৰ চলাই আহিছে। তেওঁলোকে কেতিয়াও এনেবোৰ কথাত গুৰুত্ব দিয়া নাই।
