অসমৰ মুখ্যমন্ত্রী হিমন্ত বিশ্ব শর্মাই বুধবাৰে ঘোষণা কৰে যে ৰাজ্য চৰকাৰে গুৱাহাটী মহানগৰীত কৃত্ৰিম বানৰ সমস্যা হ্ৰাস কৰাৰ লক্ষ্যৰে ২০০ কোটি টকা বিনিয়োগ কৰাৰ লগতে অনাগত দিনত এক স্থিতিস্থাপক আন্তঃগাঁথনি গঢ়ি তোলা হ’ব৷
ছ’চিয়েল মিডিয়া এক্সৰ জৰিয়তে মুখ্যমন্ত্ৰী শৰ্মাই লিখিছে, ‘জলবায়ু পৰিৱৰ্তনে তীব্ৰতৰ কৰি তোলা গুৱাহাটীৰ নগৰীয়া বানপানীৰ প্ৰত্যাহ্বানসমূহ মোকাবিলা কৰিবলৈ স্থিতিস্থাপক আন্তঃগাঁথনি সৃষ্টি কৰাত আমাৰ গুৰুত্ব। আমি অনাগত দিনত ২০০ কোটি বিনিয়োগ কৰি এই জৰুৰী সমস্যাটোক লাঘৱ কৰাত সহায় কৰিব।”
উল্লেখ্য যে, এইবাৰৰ বাৰিষাত সময়ে সময়ে হোৱা ধাৰাসাৰ বৰষুণৰ ফলত গুৱাহাটীত কৃত্ৰিম বানে ভয়ংকৰ ৰূপ ধাৰণ কৰিছিল। কৃত্ৰিম বানৰ বাবে গুৱাহাটীৰ জনসাধাৰণে ভয়ংকৰ সমস্যাৰ সন্মুখীন হ’বলগীয়া হৈছিল৷
অৱশ্যে ইয়াৰ পূৰ্বে মুখ্যমন্ত্ৰী হিমন্ত বিশ্ব শৰ্মাই অভিযোগ কৰিছিল যে গুৱাহাটীৰ উপকণ্ঠ অঞ্চলৰ যোৰাবাট পাহাৰত ব্যক্তিগত বিশ্ববিদ্যালয় আৰু অন্যান্য শিক্ষানুষ্ঠানসমূহে বৃহৎ পৰিমাণৰ বনাঞ্চল ধ্বংস কৰাৰ ফলত মহানগৰীত ভয়ংকৰ কৃত্ৰিম বানপানীৰ সৃষ্টি হয়।
