ভাৰত-বাংলাদেশ সীমান্তৰ কাছাৰ জিলাৰ পৰা আটক কৰিছে ৯ গৰাকী সন্দেহজনক ৰহিংগিয়া নাগৰিকক। বুধবাৰে অসম আৰক্ষীয়ে এই তথ্য প্ৰদান কৰে।
শীৰ্ষ বিষয়াই প্ৰদান কৰা তথ্য অনুসৰি, মঙলবাৰে নিশা কাটিগড়া অঞ্চলৰ বিশ্বনভৰপুৰ গাঁৱৰ বাসিন্দাসকলে সন্দেহজনক নাগৰিকৰ দলটোক দেখা পায় আৰু সোধা-পোছা কৰাৰ অন্তত আৰক্ষীক গতাই দিয়ে।
আৰক্ষীৰ প্ৰাথমিক তদন্তত জানিব পৰা যায় যে এই লোকসকলে ২০ বছৰ পূৰ্বে বাংলাদেশৰ পৰা ভাৰতত অবৈধভাৱে প্ৰৱেশ কৰিছিল আৰু তাৰ পিছৰ পৰা তেওঁলোকে হায়দৰাবাদ কৰ্মৰত আছিল।
আৰক্ষীৰ আগত দিয়া ভাষ্য অনুসৰি, তেওঁলোকে বাংলাদেশত থকা আত্মীয়ক সাক্ষাত কৰিবলৈ পুনৰ অবৈধভাৱে বাংলাদেশত প্ৰৱেশ কৰাৰ চেষ্টা কৰিছিল। দুজন লোকৰ সহায়ত দলটোৱে সীমান্ত পাৰ হোৱাৰ চেষ্টা চলোৱাৰ কথাও আৰক্ষীৰ আগত উল্লেখ কৰে।
আৰক্ষীয়ে জনোৱা মতে, হায়দৰাবাদৰ পৰা ৰে’লযোগে যাত্ৰা কৰা এই দলটোক এজন মধ্যভোগীয়ে সীমান্তৰ ওচৰৰ এখন হাবিলৈ লৈ যায়, য’ত তেওঁলোকে গোটেই দিনটো অনাহাৰে থাকে। পিছত খাদ্যৰ সন্ধান কৰি থকাৰ সময়তে স্থানীয় ৰাইজে তেওঁলোকক প্ৰত্যক্ষ কৰে।
