২২ মাৰ্চৰ পৰা আৰম্ভ হ’ব আই পি এলৰ ১৮ সংখ্যক ছিজন। ইয়াৰ বাবে প্ৰতিটো দলে আৰম্ভ কৰিছে প্ৰস্তুতি। পিছ পৰি ৰোৱা নাই দিল্লী কেপিটেলছো। দলটোৱে আগন্তুক ছিজনত খেলপথাৰত নামিব এগৰাকী নতুন অধিনায়কৰ নেতৃত্বত। নতুন অধিনায়কৰ দায়িত্ব লাভ কৰা ক্ৰিকেটাৰগৰাকী হৈছে ভাৰতীয় দলৰ তাৰকা অলৰাউণ্ডাৰ তথা দীৰ্ঘদিন ধৰি দিল্লী কেপিটেলছৰ হৈ খেলি অহা অক্ষৰ পেটেল।
দিল্লী কেপিটেলছে এক প্ৰেছ বিজ্ঞপ্তিৰ জৰিয়তে এই কথা ঘোষণা কৰে। ৩১ বছৰীয়া অক্ষৰ পেটেলে ২০১৯ চনত দিল্লী কেপিটেলছত যোগ দিছিল। ইয়াৰ পিছৰে পৰা তেওঁ ধাৰাবাহিকভাৱে দলটোৰ হৈ খেলি অন্যতম গুৰুত্বপূৰ্ণ ক্ৰিকেটাৰ হিচাপে নিজকে প্ৰতিষ্ঠা কৰিবলৈ সক্ষম হৈছে।
বিগত ছটা ছিজনত তেওঁ দলটোলৈ গুৰুত্বপূৰ্ণ অৱদান আগবঢ়াইছে। ৮২খন মেচত ৯৬৭ ৰান সংগ্ৰহ কৰাৰ লগতে ৭.০৯ ইকনমি ৰেটৰ সহায়ত ৬২টা উইকেট দখল কৰিছে।
দলটোৰ নতুন অধিনায়কৰ সন্দৰ্ভত দিল্লী কেপিটেলছৰ অধ্যক্ষ কিৰণ কুমাৰ গ্ৰেণ্ডীয়ে কয় যে, ‘অক্ষৰক দিল্লী কেপিটেলছৰ অধিনায়ক হিচাপে পাই আমি অত্যন্ত সুখী। ২০১৯ চনৰ পৰা তেওঁ আমাৰ দলৰ এক গুৰুত্বপূৰ্ণ অংশ আৰু এই দলৰ মূল্যবোধক প্ৰতিফলিত কৰে। যোৱা দুটা ছিজনত তেওঁ সহ-অধিনায়ক হিচাপে দায়িত্ব পালন কৰি আহিছে, আৰু এতিয়া স্বাভাৱিকতে অধিনায়কৰ ভূমিকালৈ আগবাঢ়িছে। তেওঁৰ ওচৰত আমাৰ প্ৰশিক্ষক কৰ্মচাৰী আৰু অভিজ্ঞ নেতৃত্ব গোটৰ সম্পূৰ্ণ সমৰ্থন আছে। এই নতুন ভূমিকাত তেওঁ সফল হ’ব বুলি আমি নিশ্চিত।’
ইফালে নতুন দায়িত্ব লাভ কৰাৰ পিছত অক্ষৰ পেটেলে প্ৰথমটো প্ৰতিক্ৰিয়া প্ৰকাশ কৰি কয়, ‘দিল্লী কেপিটেলছৰ অধিনায়ক হোৱাটো মোৰ বাবে এক ডাঙৰ সন্মান। মোক এই দায়িত্ব দিয়াৰ বাবে মালিক আৰু প্ৰশিক্ষক কৰ্মচাৰীৰ প্ৰতি কৃতজ্ঞতা জ্ঞাপন কৰিলোঁ। কেপিটেলছৰ হৈ খেলি থকাৰ সময়তে মই এজন ক্ৰিকেটাৰ হিচাপে প্ৰতিষ্ঠা হৈছো আৰু এতিয়া নেতৃত্ব দিবলৈ সাজু আৰু আত্মবিশ্বাসী অনুভৱ কৰিছো। আমাৰ প্ৰশিক্ষক আৰু ছাপোৰ্ট ষ্টাফে মেগা নিলামত এক সুষম আৰু শক্তিশালী দল একত্ৰিত কৰিছে, যাৰ বিশাল সম্ভাৱনা আছে। আমাৰ দলত বহু লিডাৰ আছে, যি মোৰ বাবেও সহায়ক হ’ব।’
উল্লেখ্য যে, অক্ষৰ পেটেলে আই পি এলৰ ১৫০খন খেলত ১৬৫৩ ৰান আৰু ১২৩টা উইকেট দখল কৰিছে। ২০১৬ চনত তেওঁ ৫টা বলত ৪টা উইকেট দখল কৰি এক দৰ্শনীয় হেট্ৰিক অৰ্জন কৰিছিল।
আই পি এৰ ১৮ সংখ্যক ছিজনত দিল্লী কেপিটেলছে ২৪ মাৰ্চত লক্ষ্ণৌ ছুপাৰ জায়েণ্টছৰ বিৰুদ্ধে খেলপথাৰত অৱতীৰ্ণ হৈ প্ৰতিযোগিতাখনত নিজৰ অভিযান আৰম্ভ কৰিব। অক্ষৰ পেটেলৰ লগতে কে এল ৰাহুলৰ ওপৰতো দৃষ্টি নিৱদ্ধ থাকিব ক্ৰিকেট অনুৰাগীৰ।
