বাংলাদেশৰ প্ৰাক্তন প্ৰধানমন্ত্ৰী শ্বেখ হাছিনাই অন্তৰ্বতীকালীন চৰকাৰৰ মুখ্য উপদেষ্টা মহম্মদ ইউনুছক আক্ৰমণৰ লক্ষ্য কৰি লৈছে। প্ৰাক্তন প্ৰধানমন্ত্ৰীগৰাকীয়ে কয় যে, বাংলাদেশ বৰ্তমান সন্ত্ৰাসত ডুব গৈ আছে।
বিগত ১৮ বছৰ ধৰি বাংলাদেশ কাৰাগাৰত পৰিণত হৈছে। লগতে তেওঁ ইয়াকো উল্লেখ কৰে যে, বাংলাদেশৰ সকলো সম্পদ অন্য দেশলৈ পঠিওৱাৰ ষড়যন্ত্ৰ কৰিছে।
১২ ফেব্ৰুৱাৰী বাংলাদেশত হব সাধাৰণ নিৰ্বাচন। এই নিৰ্বাচনত শ্বেখ হাছিনাৰ দল আৱামী লীগৰ পঞ্জীয়ন স্থগিত ৰাখি সেই দলক নিষিদ্ধ কৰা হৈছে। নিৰ্বাচনৰ পূৰ্বে শ্বেখ হাছিনাই বাংলাদেশৰ জনসাধাৰণক ইউনুছ চৰকাৰক উৎখাত কৰিবলৈ আবেদন জনায়।
২০২৪ত বাংলাদেশৰ পৰা নিৰ্বাসন হোৱাৰ পিছত শ্বেখ হাছিনাই প্ৰথমবাৰ ভাৰতত এক সমাৱেশত সম্বোধন কৰে। ভাৰ্চুৱেল মাধ্যমৰ জৰিয়তে দেশবাসী আৰু আৱামি লীগৰ নেতা-কৰ্মীসকলক সম্বোধন কৰি আহিছে।
দিল্লীৰ পৰা শ্বেখ হাছিনাই কয় যে, জাতিৰ পিতৃ বংগবন্ধু শ্বেখ মুজিবুৰ ৰহমানৰ নেতৃত্বত সৰ্বশ্ৰেষ্ঠ মুক্তি সংগ্ৰামত জয়ী হোৱা মাতৃভূমি বৰ্তমান উগ্ৰ সাম্প্ৰদায়িক শক্তি আৰু বিদেশী অপৰাধীৰ ভয়ানক আক্ৰমণত বিধ্বস্ত হৈ পৰিছে। বাংলাদেশৰ এসময়ৰ শান্তিপূৰ্ণ আৰু উৰ্বৰ ভূমি বৰ্তমান ৰক্তাক্ত ঠাইলৈ পৰিণত হৈছে। সমগ্ৰ দেশখনেই হৈ পৰিছে এক বিশাল কাৰাগাৰ, মৃত্যুৰ উপত্যকা। এই সকলোবোৰৰ কাৰণ মহম্মদ ইউনুছ বুলিয়ে কৈছে শ্বেখ হাছিনাই।
