বাংলাদেশত সংখ্যালঘুৰ বিৰুদ্ধে নৃশংসতাৰ আন এক বৃহৎ ঘটনা পোহৰলৈ আহিছে। বৰদিনৰ দিনা বান্দৰবনত খ্ৰীষ্টান ত্ৰিপুৰা সম্প্ৰদায়ৰ ১৭টাকৈ ঘৰ জ্বলাই দিয়া হয়। এই ঘৰবোৰত জুই লগায়েই পলায়ন কৰে দুষ্কৃতিকাৰী।
লামা উপজিলাৰ চৰাই ইউনিয়নৰ নতুন টংঝিৰি ত্ৰিপুৰা পাৰাত নিশা প্ৰায় ১২.৩০ বজাত সংঘটিত হয় এই অগ্নিসংযোগৰ ঘটনা। আচলতে দুষ্কৃতিকাৰীবোৰে সেই ঘৰবোৰত জুই লগাই দিছিল, যেতিয়া মানুহে আন এখন গাঁৱলৈ বৰদিন উদযাপন কৰিবলৈ গৈছিল, কাৰণ তেওঁলোকৰ অঞ্চলত কোনো গীৰ্জা নাছিল।
স্থানীয় লোকে জনোৱা অনুসৰি, ত্ৰিপুৰা সম্প্ৰদায়ৰ ১৯টা ঘৰৰ ভিতৰত ১৭টা ঘৰ জ্বলি ছাই হৈ পৰে। তেওঁ কয় যে, এই অঞ্চলত দীৰ্ঘদিন ধৰি ত্ৰিপুৰা সম্প্ৰদায়ৰ লোকে বাস কৰিছিল। কিন্তু কেইবছৰমান পূৰ্বে তেওঁলোকক বলপূৰ্বকভাৱে উচ্ছেদ কৰা হৈছিল। তেওঁ দাবী কৰে যে, এই অঞ্চলটো আৱামী লীগৰ শাসনৰ সময়ত এজন আৰক্ষী বিষয়াৰ পত্নীক পট্টাত দিয়া হৈছিল। ইয়াৰ পিছত তেওঁলোকে গাঁৱত গছপুলি ৰোপণ কৰিলে।
নতুন টংঝিৰি পাৰাৰ মুৰব্বী পাইছাপ্ৰু ত্ৰিপুৰাই কয় যে, তেওঁলোকে তাত তিনি-চাৰি প্ৰজন্ম ধৰি বাস কৰি আহিছে। নিজকে ‘এছ পি মেন’ বুলি কোৱা এদল মানুহে তেওঁলোকক চাৰি-পাঁচ বছৰ আগতে উচ্ছেদ কৰিছিল।
ইফালে ভুক্তভোগী গুংগামণি ত্ৰিপুৰাই কয় যে, তেওঁলোকৰ ঘৰবোৰ সম্পূৰ্ণৰূপে জ্বলি ছাই হৈ গৈছে। ঘৰৰ একো সামগ্ৰীয়েই তেওঁলোকে বচাব পৰা নোৱাৰিলে। আৱামি লীগ শাসনৰ পতনৰ পিছত বাসিন্দাসকল পুনৰ পূৰ্বস্থানলৈ ঘূৰি আহি তাত নতুনকৈ নিৰ্মাণ কৰা ঘৰত থাকিবলৈ আৰম্ভ কৰে।
ইফালে ভুক্তভোগীসকলে অপৰাধীক কঠোৰ শাস্তি প্ৰদানৰ দাবী জনায়। বান্দৰবন আৰক্ষীৰ উদ্ধৃতি দি তেওঁলোকে এই সন্দৰ্ভত এফআইআৰ ৰুজু কৰা বুলি জানিবলৈ দিয়ে।
