বাংলাদেশৰ প্ৰধানমন্ত্ৰী পদৰ পৰা শ্বেখ হাছিনাক উচ্ছেদ কৰাৰ পিছত দুয়োখন দেশৰ সম্পৰ্কৰ বহু উন্নতি হৈছে। শেহতীয়াকৈ বাংলাদেশৰ এজন জ্যেষ্ঠ সামৰিক বিষয়াই পাকিস্তান ভ্ৰমণ কৰিছিল।
পাকিস্তানত থকা বাংলাদেশৰ দূতাবাসে দ্বিপাক্ষিক সম্পৰ্ক আৰু অধিক সুদৃঢ় কৰাৰ বাবে দুয়োখন দেশৰ মাজত প্ৰত্যক্ষ বিমান সেৱা আৰম্ভ কৰাৰ কথা ঘোষণা কৰিছে। এক প্ৰতিবেদন অনুসৰি, বিগত ২৫ জানুৱাৰীত পেছাৱৰৰ এখন সংবাদমেলত মহম্মদ ইকবাল হুছেইনে এই কথা উল্লেখ কৰে।
হুছেইনে দুয়োখন দেশৰ মাজত গভীৰ আৰু ঐতিহাসিক সম্পৰ্কৰ ওপৰত গুৰুত্ব আৰোপ কৰি ভ্ৰমণ আৰু সংযোগৰ সুবিধাৰ বাবে প্ৰত্যক্ষ বিমান সেৱা স্থাপনৰ ইচ্ছা প্ৰকাশ কৰে। তেওঁ কয় যে, এনে পদক্ষেপে পৰ্যটন, শিক্ষা, বাণিজ্যকে ধৰি বিভিন্ন খণ্ডত সহযোগিতা বৃদ্ধি কৰিব। অৱশ্যে পোনপটীয়া বিমান সেৱাৰ কোনো টাইমলাইন ঘোষণা কৰা হোৱা নাছিল।
উল্লেখযোগ্য যে, বাংলাদেশত শ্বেখ হাছিনাক প্ৰধানমন্ত্ৰীৰ পদৰ পৰা অপসাৰণ কৰাৰ পিছৰে পৰা দুয়োখন দেশৰ সম্পৰ্কৰ বহু উন্নতি হৈছে। শেহতীয়াকৈ বাংলাদেশৰ এজন জ্যেষ্ঠ সামৰিক বিষয়াই পাকিস্তান ভ্ৰমণ কৰি শীৰ্ষ সামৰিক বিষয়াসকলৰ সৈতে পৃথক পৃথক বৈঠকত মিলিত হৈ প্ৰতিৰক্ষা খণ্ডত সহযোগিতাৰ সম্ভাৱনাৰ সন্ধান কৰে।
শেহতীয়াকৈ পাকিস্তানৰ চোৰাংচোৱা সংস্থা আই এছ আইৰ মুৰব্বী লেফটেনেণ্ট জেনেৰেল আছিফ মালিকে ২২ জানুৱাৰীত ঢাকাত উপস্থিত হয়। ডুবাইৰ পৰা ঢাকাত উপস্থিত হোৱা আই এছ আইৰ মুৰব্বীগৰাকীক আদৰণি জনায় বাংলাদেশৰ সেনাৰ কোৱাৰ্টাৰ মাষ্টাৰ জেনেৰেল লেফটেনেণ্ট জেনেৰেল মহম্মদ ফৈজুৰ ৰহমানে। দশক পিছত পাকিস্তানী চোৰাংচোৱা সংস্থাৰ কোনো শীৰ্ষ বিষয়াৰ এইটোৱেই আছিল প্ৰথম ঢাকা ভ্ৰমণ। আই এছ আইৰ মুৰব্বীগৰাকীৰ এই ভ্ৰমণৰ পৰা বহু অৰ্থ উলিওৱা হৈছে।
ইয়াৰ পূৰ্বে বাংলাদেশৰ উচ্চ পদস্থ সামৰিক বিষয়া জেনেৰেল এছ এম কামৰুল হাছানে ১৪ জানুৱাৰীত পাকিস্তান ভ্ৰমণ কৰিছিল। কমৰুলে পাকিস্তানৰ সেনা প্ৰধান জেনেৰেল অসীম মুনিৰক সাক্ষাৎ কৰিছিল। জল্পনা-কল্পনা কৰা হৈছে যে দুয়োখন দেশৰ মাজত কিছু প্ৰতিৰক্ষা চুক্তি স্বাক্ষৰিত হ’ব পাৰে।
বাংলাদেশ আৰু পাকিস্তানৰ মাজত ক্ৰমবৰ্ধমান ঘনিষ্ঠতাই ভূ-ৰাজনীতিৰ পৰিৱৰ্তনৰ ইংগিত দিছে। বাংলাদেশৰ অন্তৱৰ্তীকালীন চৰকাৰৰ ধাৰা স্পষ্টকৈ দেখা গৈছে, যিটো ভাৰতৰ বাবেও চিন্তাৰ কাৰণ।
