ঢাকাত বাংলাদেশৰ প্ৰতিষ্ঠাপক শ্বেখ মুজিবুৰ ৰহমানৰ ঐতিহাসিক বাসগৃহ ভাঙি পেলোৱাৰ ঘটনাক ভাৰতে গৰিহণা দিয়াৰ তীব্ৰ প্ৰতিক্ৰিয়া প্ৰকাশ কৰে বাংলাদেশে। বাংলাদেশৰ অন্তৱৰ্তীকালীন চৰকাৰে এই ঘটনাক দেশৰ আভ্যন্তৰীণ বিষয় বুলি অভিহিত কৰি ভাৰতৰ মন্তব্য অপ্ৰত্যাশিত আৰু অনুচিত বুলি উল্লেখ কৰে।
৫ ফেব্ৰুৱাৰীত নিশা ঢাকাৰ ৩২ নং ধনমণ্ডিত শ্বেখ মুজিবুৰ ৰহমানৰ বাসগৃহত হাজাৰ হাজাৰ প্ৰতিবাদকাৰীয়ে অগ্নিসংযোগ কৰাৰ পৰাই এই বিতৰ্কৰ আৰম্ভ হয়।এই গৃহ বাংলাদেশৰ মুক্তিযুদ্ধৰ প্ৰতীক আছিল, য’ৰ পৰা ১৯৭১ চনত শ্বেখ মুজিবুৰে পাকিস্তানৰ পৰা বাংলাদেশক স্বাধীন ঘোষণা কৰিছিল। পিছলৈ এক কীৰ্তিচিহ্নলৈ ৰূপান্তৰিত কৰা হয়।
ভাৰতে এই কাণ্ডক লৈ গভীৰ উদ্বেগ প্ৰকাশ কৰি ইয়াক “বৰ্বৰতাৰ কাম” বুলি অভিহিত কৰে। ভাৰতৰ বৈদেশিক মন্ত্ৰালয়ৰ মুখপাত্ৰ ৰণধীৰ জয়ছৱালে কয় যে, শ্বেখ মুজিবুৰ ৰহমানৰ এই ঐতিহাসিক বাসগৃহ বাংলাদেশৰ জনসাধাৰণৰ বীৰত্বপূৰ্ণ প্ৰতিৰোধৰ প্ৰতীক আছিল আৰু ইয়াৰ ধ্বংস অতি মৰ্মান্তিক।
কিন্তু বাংলাদেশ চৰকাৰে ভাৰতৰ এই মন্তব্যক আভ্যন্তৰীণ বিষয় বুলি অভিহিত কৰি তীব্ৰ সমালোচনা কৰে। বাংলাদেশৰ বৈদেশিক মন্ত্ৰালয়ৰ মুখপাত্ৰ মহম্মদ ৰফিকুল আলমে কয় যে, ভাৰতীয় বৈদেশিক মন্ত্ৰালয়ৰ মন্তব্য বাংলাদেশৰ আভ্যন্তৰীণ পৰিক্ৰমাৰ সৈতে জড়িত আৰু ই অনুচিত। তেওঁলোকে আশা কৰে যে বাংলাদেশৰ এই আভ্যন্তৰীণ পৰিক্ৰমাত আন দেশে যাতে হস্তক্ষেপ নকৰে।
ইয়াৰ পূৰ্বে বাংলাদেশ চৰকাৰেও শ্বেখ হাছিনাৰ ভাষণ সন্দৰ্ভত ভাৰতৰ মন্তব্যক লৈ অসন্তুষ্টি প্ৰকাশ কৰিছে। এনে মন্তব্যই ভাৰত-বাংলাদেশৰ দ্বিপাক্ষিক সম্পৰ্কত প্ৰভাৱ পেলাব পাৰে বুলি বাংলাদেশে সকীয়াই দিছিল। বৰ্তমান বিতৰ্কৰ মাজতে দুয়োখন দেশৰ সম্পৰ্কত ইয়াৰ প্ৰভাৱ পৰাৰ সম্ভাৱনা বৃদ্ধি পাইছে।
শ্বেখ মুজিবুৰ ৰহমানৰ বাসগৃহ বাংলাদেশৰ জাতীয় চেতনা আৰু স্বাধীনতা সংগ্ৰামৰ এক গুৰুত্বপূৰ্ণ প্ৰতীক হিচাপে পৰিগণিত হৈছে। ইয়াৰ ধ্বংসৰ ঘটনা কেৱল বাংলাদেশৰ ভিতৰতে নহয়, আন্তঃৰাষ্ট্ৰীয় পৰ্যায়তো চিন্তনীয় বিষয় হৈ পৰিছে। ১৯৭১ চনৰ বাংলাদেশ যুদ্ধত গুৰুত্বপূৰ্ণ ভূমিকা গ্ৰহণ কৰা ভাৰতে ৰাজহুৱাভাৱে এই ঘটনাক লৈ অসন্তুষ্টি প্ৰকাশ কৰে। কিন্তু বাংলাদেশ চৰকাৰৰ মতে এয়া সম্পূৰ্ণৰূপে তেওঁলোকৰ আভ্যন্তৰীণ বিষয় আৰু এই কাৰ্যত বাহিৰৰ দেশৰ হস্তক্ষেপ অনুচিত।
