মেঘালয়ৰ ভাৰত-বাংলাদেশ সীমান্তৰ এখন গাঁৱৰ পৰা আহিছে এক চাঞ্চল্যকৰ খবৰ। সীমান্তৰ সমীপত অৱস্থিত গাঁওখনত নিশাৰ আন্ধাৰৰ সুযোগ লৈ বাংলাদেশৰ এটা অস্ত্ৰধাৰী দলে অবৈধভাৱে প্ৰৱেশ কৰি এজন লোকক নিৰ্মমভাৱে প্ৰহাৰ কৰাৰ ঘটনা পোহৰলৈ আহিছে।
এই চাঞ্চল্যকৰ ঘটনাৰ পিছতে সীমান্ত সুৰক্ষা বাহিনী (বি এছ এফ)ক হাই এলাৰ্ট জাৰি কৰা হৈছে। ঘটনা সন্দৰ্ভত আৰক্ষীয়ে এজন বাংলাদেশী নাগৰিকক আটক কৰি সোধা-পোচা অব্যাহত ৰাখিছে।
শুকুৰবাৰে গভীৰ নিশা মেঘালয়ৰ দক্ষিণ পশ্চিম খাচী হিলছ জিলাৰ অন্তৰ্গত দুৰ্গম গাঁও ৰোংদোংগাই গাঁৱত এই ঘটনা সংঘটিত হৈছে। এই গাঁওখন বাংলাদেশ সীমান্তৰ পৰা প্ৰায় ৮-১০ কিলোমিটাৰ নিলগত অৱস্থিত।
মেঘালয় আৰক্ষীৰ সূত্ৰই জানিব দিয়া অনুসৰি, শুকুৰবাৰে নিশা বাংলাদেশৰ ৯ জনীয়া এটা অস্ত্ৰধাৰী দলে অবৈধভাৱে ভাৰতত প্ৰৱেশ কৰে। এই দুৰ্বৃত্তৰ দলটোৱে গাঁওখনত প্ৰৱেশ কৰি বালসৰংগ এ মাৰাক নামৰ এজন ব্যক্তিক চোকা অস্ত্ৰৰে আক্ৰমণ কৰি গুৰুতৰভাৱে আঘাতপ্ৰাপ্ত কৰে।
আক্ৰমণকাৰী পলায়ন কৰাৰ পিছত গাঁৱৰ ৰাইজে সেই স্থানতে কেইবাটাও সন্দেহজনক সামগ্ৰী উদ্ধাৰ কৰে। ইয়াৰ ভিতৰত আছিল এজন বাংলাদেশী আৰক্ষী কনিষ্টবলৰ পৰিচয় পত্ৰ আৰু বাংলাদেশী টকা। গাঁৱৰ ৰাইজে এই বস্তুবোৰ আৰক্ষীৰ হাতত গতাই দিয়ে।
পিছত আৰক্ষীয়ে ঘটনাস্থলৰ পৰা আৰু অধিক সামগ্ৰীও উদ্ধাৰ কৰে, য’ত হেণ্ডকাফ, মেগজিনৰ কভাৰ, পিষ্টল ৰখা হোলষ্টাৰ, ৰেডিঅ’ চেট, মোবাইল, ফেচ মাস্ক, কুঠাৰ আৰু তাঁৰ কাটাৰ আদিও পোৱা যায়।
শেহতীয়াকৈ সংঘটিত হোৱা ঘটনাৰ পিছতে বি এছ এফে তাৎক্ষণিক ব্যৱস্থা গ্ৰহণ কৰি সীমান্ত অঞ্চলত টহল তীব্ৰতৰ কৰি তুলিছে। বি এছ এফৰ সূত্ৰইও নিশ্চিত কৰিছে যে এজন সন্দেহযুক্ত বাংলাদেশী নাগৰিকক আটক কৰি কঠোৰ জেৰা চলি আছে।
