পুনৰ অশান্ত হৈছে বাংলাদেশৰ পৰিস্থিতি। প্ৰতি মুহূৰ্তত বাঢ়িছে বাংলাদেশত মৃতকৰ সংখ্যা। দেওবাৰে বাংলাদেশত সংঘৰ্ষ আৰু আৰক্ষীৰ গুলীচালনাত প্ৰায় ৯১ জন লোক নিহত আৰু শ শ লোক আহত হয় বুলি আৰক্ষীয়ে জানিবলৈ দিয়ে।
ইফালে, প্ৰতিবাদকাৰীয়ে প্ৰধানমন্ত্ৰী শ্বেখ হাছিনাৰ পদত্যাগৰ দাবী তুলিছে। আৰক্ষীয়ে হাজাৰ হাজাৰ প্ৰতিবাদকাৰীক ছত্ৰভংগ দিবলৈ কন্দুৱা গেছ আৰু শিলশুটি নিক্ষেপ কৰিছে।
উল্লেখ্য যে, ১৯ জুলাইত চৰকাৰী চাকৰিত সংৰক্ষণ বাতিল ৰখাৰ দাবীত ছাত্ৰ-ছাত্ৰীসকলে কৰা প্ৰতিবাদত ৬৭ জন লোক নিহত হয়। একেদৰে দেওবাৰৰ সংঘৰ্ষত প্ৰায় ১৩ জন আৰক্ষী নিহত হৈছিল।
আনহাতে, বাংলাদেশৰ শ্বেখ হাছিনা চৰকাৰে দেওবাৰে ৬ বজাৰ পৰা দেশখনত অনিৰ্দিষ্টকালৰ বাবে সান্ধ্ৰ আইন জাৰি কৰিছে।
লগতে, সোমবাৰৰ পৰা তিনিদিনীয়া সাধাৰণ বন্ধৰ ঘোষণা কৰা হৈছে দেশখনত। সান্ধ্ৰ আইনৰ লগতে ইন্টাৰনেট কৰ্তন কৰা হৈছে।
বাংলাদেশৰ পৰিস্থিতি সন্দৰ্ভত ভাৰত চৰকাৰৰ এলাৰ্ট
বাংলাদেশৰ হিংসাত্মক পৰিস্থিতিৰ প্ৰতি লক্ষ্য ৰাখি বিদেশ মন্ত্ৰালয়ে সতৰ্কবাণী জাৰি কৰিছে। বাংলাদেশৰ পৰিস্থিতি শান্ত নোহোৱা পৰ্যন্ত বাংলাদেশ ভ্ৰমণ নকৰিবলৈ আহ্বান জনাইছে বিদেশ মন্ত্ৰালয়ে।
বাংলাদেশত থকা ভাৰতীয় নাগৰিকলৈ পৰামৰ্শ জাৰি
বিদেশ মন্ত্ৰালয়ে বাংলাদেশত থকা ভাৰতীয় নাগৰিকলৈ পৰামৰ্শ জাৰি কৰিছে। পৰিস্থিতি বেয়া হ’লে ঢাকাত থকা ভাৰতীয় দূতাৱাসৰ কাৰ্যালয়ৰ সৈতে যোগাযোগ কৰিবলৈ আহ্বান জনাইছে।
শ্বেখ হাছিনা চৰকাৰলৈ প্ৰত্যাহ্বান
বিগত ২০ বছৰৰ মূৰত শ্বেখ হাছিনা চৰকাৰলৈ এইয়া এক বৃহৎ প্ৰত্যাহ্বান। শ্বেখ হাছিনাই চতুৰ্থবাৰৰ বাবে বাংলাদেশৰ প্ৰধানমন্ত্ৰীৰূপে দায়িত্বভাৰ গ্ৰহণ কৰিছে। চতুৰ্থবাৰৰ বাবে প্ৰধানমন্ত্ৰী হিচাপে দায়িত্ব লোৱাৰ পিছতে সংৰক্ষণ ব্যৱস্থাক লৈ হোৱা আন্দোলন শ্বেখ হাছিনাৰ বাবে প্ৰত্যাহ্বান হিচাপে থিয় দিছে।
যোগাযোগ ব্য়াহত হৈছে বাংলাদেশত
দেওবাৰে প্ৰতিবাদকাৰীসকলে শ্বেখ হাছিনাৰ পদত্যাগৰ দাবী তুলিছে। প্ৰতিবাদকাৰীসকলে ৰাষ্ট্ৰীয় ঘাইপথ অৱৰোধ কৰিছে। অকল ঢাকাত নহয় সমগ্ৰ দেশখনতে প্ৰতিবাদৰ জোৱাৰ উঠিছে। ইফালে, নিৰাপত্তাৰক্ষীৰ সৈতে হোৱা বৈঠকত শ্বেখ হাছিনাই আন্দোলনকাৰী সকল প্ৰতিবাদকাৰী নহয়, আতংকবাদী বুলিহে দাবী কৰিছে।
