অহা ২৮ ছেপ্টেম্বৰত অনুষ্ঠিত হ’ব ভাৰত ক্ৰিকেট নিয়ন্ত্ৰণ ব’ৰ্ড (বিচিচিআই)ৰ নিৰ্বাচন। সেই দিনটোতেই সভাপতি, উপ-সভাপতি, সচিব, কোষাধ্যক্ষৰ লগতে যুটীয়া সচিব পদত নতুনকৈ নিযুক্তি দিয়া হ’ব।
টাইমছ অৱ ইণ্ডিয়াত প্ৰকাশিত এক বাতৰি অনুসৰি, ৯৪ সংখ্যক বাৰ্ষিক সভা সন্দৰ্ভত সকলো ৰাজ্যিক ক্ৰিকেট সন্থালৈ বাৰ্তা প্ৰেৰণ কৰিছে বিচিচিআইৰ বৰ্তমানৰ সচিব দেৱজিৎ শইকীয়াই। এই বৈঠক মুম্বাইস্থিত বিচিচিআইৰ মুখ্য কাৰ্যালয়ত অনুষ্ঠিত হ’ব।
উল্লেখ্য যে, ব’ৰ্ডৰ সভাপতি ৰ’জাৰ বিন্নীৰ বয়স ৭০ বছৰ হোৱা বাবে তেওঁ সভাপতি পদৰ পৰা পদত্যাগ কৰিবলগীয়া হৈছে। তেওঁ সভাপতি পদ ত্যাগ কৰা বাবেই অনুষ্ঠিত হ’ব এই নিৰ্বাচন।
দেৱজিৎ শইকীয়াই সকলো ৰাজ্যিক ক্ৰিকেট সন্থালৈ বাৰ্তা প্ৰেৰণ কৰি নিজৰ বিবৃতিত লিখিছে, ‘সকলোকে জাননী জাৰি কৰা হৈছে যে ২৮ ছেপ্টেম্বৰত মুম্বাইস্থিত বিচিচিআইৰ মুখ্য কাৰ্যালয়ত অনুষ্ঠিত হ’ব ৯৪ সংখ্যক বাৰ্ষিক বৈঠক। এই সভাত সকলোকে উপস্থিত থাকিবলৈ অনুৰোধ জনোৱা হৈছে।’
স্মৰ্তব্য যে, বিচিচিআইৰ এই বাৰ্ষিক বৈঠকৰ দিনটোতেই অনুষ্ঠিত হ’ব এছিয়া কাপ ২০২৫ৰ ফাইনেল। বৰ্তমান খালী হৈ থকা বিচিচিআইৰ সভাপতি পদ সন্দৰ্ভতো এই বৈঠকত সিদ্ধান্ত লোৱা হ’ব।
আনহাতে, আই পি এলৰ অধ্যক্ষ অৰুণ সিং ধুমলৰ ৬ বছৰীয়া কাৰ্যকাল সম্পূৰ্ণ হৈছে, যাৰ বাবে তেওঁ ৩ বছৰৰ বাধ্যতামূলক কুল অফ পিৰিয়ডত যাব। সচিব পদত দেৱজিত শইকীয়া বাহাল থকাটো প্ৰায় নিশ্চিত।
প্ৰভতেজ ভাটিয়া আৰু ৰোহন দেশাইও নিজ নিজ পদত থকাৰ সম্ভাৱনা আছে। খবৰ অনুসৰি অৰুণ ধূমলৰ ঠাইত অনিৰুদ্ধ চৌধুৰীক আই পি এলৰ অধ্যক্ষ হিচাপে নিযুক্তি দিব পাৰে।
নিৰ্বাচনত কোন কোন পদত হ’ব নিযুক্তি
৯৪ সংখ্যক বাৰ্ষিক সভাত সভাপতি, উপ-সভাপতি, সচিব, যুটীয়া সচিব আৰু কোষাধ্যক্ষ পদত নিযুক্তি হোৱাৰ সম্ভাৱনা আছে।
