পঞ্চায়ত নিৰ্বাচনক লৈ উত্তাল হৈছে ৰাজ্যৰ ৰাজনীতি। মনোনয়ন দাখিলৰ প্ৰক্ৰিয়া সম্পূৰ্ণ হোৱাৰ পিছতে তৎপৰ হৈ পৰিছে ৰাজনৈতিক দলসমূহ। শাসকীয় বিজেপিৰ আগ্ৰাসী ৰূপৰ বিপৰীতে প্ৰাৰ্থিত্ব কেন্দ্ৰিক সংঘাতে জুৰুলা কৰা ৰাজ্যৰ প্ৰধান বিৰোধী ৰাজনৈতিক দল কংগ্ৰেছত এইবাৰ তীব্ৰ খহনীয়া হোৱা পৰিলক্ষিত হৈছে।
বিভিন্ন প্ৰান্তত টিকট প্ৰদানক কেন্দ্ৰ কৰি হোৱা খেলিমেলিৰ পাছত এইবাৰ বঙাইগাঁৱত বহু সংখ্যক কংগ্ৰেছ কৰ্মীয়ে দল ত্যাগ কৰাৰ খবৰ আহিছে।
জানিব পৰা অনুসৰি, বঙাইগাঁও জিলাৰ ধনতোলাত ৩০০ৰো অধিক কংগ্ৰেছ নেতা-কৰ্মীয়ে অসম গণ পৰিষদ চমুকৈ অগপ দলত যোগদান কৰিছে। শনিবাৰে নিশা অনুষ্ঠিত হোৱা অগপৰ যোগদান সভাত এইসকল নেতা-কৰ্মীয়ে কংগ্ৰেছ ত্যাগ কৰি আঞ্চলিক দলটোত যোগ দিয়ে।
অগপ দলৰ কেন্দ্ৰীয় সম্পাদক তথা প্ৰাক্তন বিধায়ক ভূপেন ৰায়ৰ উপস্থিতিত প্ৰায় তিনিশ কংগ্ৰেছী নেতাৰ লগতে ভালেকেইগৰাকী এ আই ইউ ডি এফ কৰ্মীয়েও অগপত যোগদান কৰে।
যোগদান কাৰ্যসূচীৰ পিছতে অগপৰ জ্যেষ্ঠ নেতা ভূপেন ৰায়ে সংবাদ মাধ্যমৰ আগত কয় যে আজিৰ যোগদান কাৰ্যসূচীৰ পৰা এটা কথা স্পষ্ট হয় যে কংগ্ৰেছ দলৰ প্ৰতি ৰাইজৰ আস্থা হ্ৰাস পাইছে আৰু আগন্তুক নিৰ্বাচনত অগপই ভাল ফলাফল লাভ কৰিব।
উল্লেখ্য যে, মে’ মাহত দুটা পৰ্যায়ত অনুষ্ঠিত হ’ব পঞ্চায়ত নিৰ্বাচন। ২ মে’ত উজনি অসমৰ লগতে বৰাক উপত্যকাৰ ১৪ খন জিলাত অনুষ্ঠিত হ’ব প্ৰথম পৰ্যায়ৰ নিৰ্বাচন। আনহাতে ৭ মে’ত নামনি অসমৰ ১৩ খন জিলাত হ’ব দ্বিতীয় পৰ্যায়ৰ ভোটগ্ৰহণ। ১১ মে’ত ঘোষণা কৰা হ’ব ফলাফল।
