যৌতুকত গাড়ী, ঘৰ, সোণ আৰু সম্পত্তিৰ দাবীৰ প্ৰথা অতীজৰে পৰা চলি আহিছে। যদিও আইন অনুসৰি যৌতুক লোৱাটো অপৰাধ, তথাপিও বহু ঠাইত এতিয়াও বিবাহত গোপনে যৌতুক লোৱা হয়। কেৱল এয়াই নহয়, মহিলাগৰাকী শহুৰেকৰ ঘৰলৈ অহাৰ পিছতো তেওঁৰ পৰা যৌতুক দাবী কৰা হয়।
বহু ঠাইত শহুৰৰ ঘৰে যৌতুক নিদিয়াৰ বাবে নৱবিবাহিতাক অত্যাচাৰো কৰে, কিন্তু যৌতুকত এগৰাকী মহিলাৰ বৃক্ক বিচৰাৰ কথা হয়তো আপুনি কেতিয়াও শুনা নাই। কিন্তু এনে এক ঘটনা সংঘটিত হৈছে ভাৰতৰে এখন ৰাজ্যত।
উত্তৰ বিহাৰৰ মুজাফ্ফৰপুৰত এগৰাকী মহিলাই নিজৰ পুত্ৰৰ বাবে যৌতুক হিচাপে কইনাৰ পৰা বৃক্ক বিচৰাৰ এক অদ্ভুত গোচৰ পোহৰলৈ আহিছে। এই সন্দৰ্ভত ভুক্তভোগী মহিলাগৰাকীয়ে মুজাফ্ফৰপুৰ মহিলা আৰক্ষী থানাত এজাহাৰ দাখিল কৰিছে।
ভুক্তভোগীগৰাকী এতিয়া মাতৃগৃহত। তেওঁ নিজৰ ওপৰত সংঘটিত অত্যাচাৰৰ কথা আৰক্ষীক জনাই কয় যে তেওঁ ২০২১ চনত এই ঘৰখনলৈ বিয়া হৈ আহিছিল।
ভুক্তভোগীয়ে কয় যে, বিয়াৰ পিছত প্ৰথম অৱস্থাত সকলো ঠিকেই আছিল। কিন্তু তাৰ পিছত তেওঁৰ শাহু-শহুৰে তেওঁক মাতৃগৃহৰ পৰা পইচা, বাইক আৰু গহনা আনিবলৈ মানসিকভাৱে হাৰাশাস্তি কৰিবলৈ ধৰিলে আৰু তেওঁক মাৰপিট কৰিবলৈ ধৰিলে। তেওঁলোকৰ দাবী মানি নল’লে তেওঁৰ এটা কিডনী অসুস্থ স্বামীক দান দিবলৈ হেঁচা প্ৰয়োগ কৰিবলৈ ধৰিলে।
মহিলাগৰাকীয়ে কয় যে, তেওঁ নিজৰ স্বামীৰ কিডনীৰ ৰোগৰ বিষয়ে বিয়াৰ দুবছৰৰ পিছতহে গম পায়। কিডনী দান দিবলৈ হেঁচা দি তেওঁৰ শাহু-শহুৰে তেওঁক প্ৰহাৰ আৰু অত্যাচাৰ কৰিছিল। ইয়াৰ পিছতে দীপ্তিয়ে পিতৃ-মাতৃৰ ঘৰলৈ আহি মহিলা থানাত এজাহাৰ দাখিল কৰে।
