অহা ১৯ জুনত অনুষ্ঠিত হ’বলীয়া ৰাজ্যসভাৰ দুখন আসনৰ বাবে নিৰ্বাচন আৰু চলিত বছৰৰ শেষৰফালে হ’বলগীয়া বিটিআৰ নিৰ্বাচনক লৈ আজি বশিষ্ঠস্থিত বাজপেয়ী ভৱনত দুখনকৈ গুৰুত্বপূৰ্ণ বৈঠক অনুষ্ঠিত হয়।
এই বৈঠকৰ অন্তত মুখ্যমন্ত্ৰী ড০ হিমন্ত বিশ্ব শৰ্মাই সংবাদ মাধ্যমৰ আগত মন্তব্য কৰি কয় যে ৰাজ্যসভাৰ এখন আসন অগপক এৰি দিয়া হৈছে।
তেওঁ লগতে কয়, ‘দ্বিতীয়খন আসনৰ বাবে বিজেপিয়ে ১২ খন আবেদন লাভ কৰিছিল। ১২ জন ব্যক্তিৰ নামেই নিৰ্বাচন সমিতিয়ে ৰাষ্ট্ৰীয় সমিতিলৈ প্ৰেৰণ কৰিব। আৰু ইয়াৰ পৰাই এজনক নিৰ্বাচিত কৰিব কেন্দ্ৰীয় নেতৃত্বই।’
আবেদনকাৰী সকল হৈছে কুইন ওজা, ৰাজদ্বীপ ৰয়, মিছন ৰঞ্জন দাস, ৰাজেন গোঁহাই, সুনীতা চাংকাকতি, প্ৰদীপ ঠাকুৰীয়া, সঞ্জীৱ গোস্বামী, দয়ানন্দ বৰগোঁহাই, বিজয় কুমাৰ গুপ্তা, মৃদুলা বৰকাকতী, ভাস্কাৰ দাহাল, কণাদ পুৰকায়স্থ আৰু বিশ্বৰূপ ভট্টাচাৰ্য।
ইফালে আনখন বৈঠকত বিটিআৰ নিৰ্বাচনৰ ক্ষেত্ৰত ৫ খন জিলাৰ পৰা অহা বিজেপিৰ সমীক্ষাৰ প্ৰতিবেদন বিবেচনা কৰা হ’ল বুলি উল্লেখ কৰে মুখ্যমন্ত্ৰী শৰ্মাই।
মুখ্যমন্ত্ৰী শৰ্মাই কয়, ‘বিটিআৰত বিজেপিয়ে ৩০ খন আসনত প্ৰতিদ্বন্দ্বিতা কৰাৰ সক্ষমতা আছে। তথাপি ৩০ খনত প্ৰতিদ্বন্দ্বিতা কৰা হ’ব নে ২৬ খন আসনত প্ৰতিদ্বন্দ্বিতা কৰিব তাক লৈ পুনৰ বিবেচনা কৰা হ’ব।’
‘কোনো বড়ো ৰাজনৈতিক দলৰ সৈতে বিজেপিয়ে সংঘাতৰ ৰাজনীতি সৃষ্টি নকৰে। শান্তি, সম্প্ৰীতি, সমন্বয়ৰ মাজেৰে বিজেপি আগবাঢ়িব’, এইদৰে উল্লেখ কৰে মুখ্যমন্ত্ৰী শৰ্মাই।
ইনপুট : ধ্ৰুৱজ্যোতি মেধি
