বলীউডৰ জনপ্ৰিয় অভিনেত্ৰী স্বৰা ভাস্কৰ ছ’চিয়েল মিডিয়াত যথেষ্ট সক্ৰিয়। চিনেমাৰ উপৰি ৰাজনৈতিক বিষয়ৰ সন্দৰ্ভতো সঘনাই পোষ্ট দিয়া দেখা যায় স্বৰাক। অৱশ্যে এইবাৰ ৰাজনৈতিক বিষয়ত পোষ্ট কৰাৰ বাবেই বন্ধ কৰা হ’ল অভিনেত্ৰীগৰাকীৰ টুইটাৰ একাউণ্ট।
৭৬ সংখ্যক গণৰাজ্য দিৱসত জাতিৰ পিতাৰ বিৰুদ্ধে পোষ্ট কৰে স্বৰাই। সেই পোষ্টক কেন্দ্ৰ কৰিয়েই তেওঁৰ টুইটাৰ একাউণ্ট স্থায়ীভাবে বন্ধ কৰি দিয়া হ’ল বুলি জানিবলৈ দিছে টুইটাৰে। স্বৰাই নিজেই এক দীঘলীয়া পোষ্টযোগে নিজৰ ইনষ্টাগ্ৰামত এই কথা ঘোষণা কৰিছে।
স্বৰাই গণৰাজ্য দিৱসত দুটাকৈ পোষ্ট কৰিছিল। সেই দুটাৰ বিৰুদ্ধে টুইটাৰে কপিৰাইটৰ অভিযোগ দাখিল কৰিছে। তাৰ পিছত তেওঁৰ টুইটাৰ হেণ্ডেল বন্ধ কৰি দিয়া হৈছে।
ছ’চিয়েল মিডিয়াত এটা দীঘলীয়া পোষ্টত ক্ষোভ প্ৰকাশ কৰি অভিনেত্ৰীগৰাকীয়ে লিখে যে, তেওঁ পোষ্ট কৰা দুখন ফটোতেই কপিৰাইট উলংঘাৰ অভিযোগ উত্থাপন হৈছে এক্সে। যাৰ বাবে তেওঁৰ একাউণ্টটো স্থায়ীভাৱে বাতিল কৰাৰ সিদ্ধান্ত লৈছে টুইটাৰে।
পোষ্ট কৰা এখন ছবিত তেওঁ ‘গান্ধী হুম শৰ্মিন্দ হায়, তেৰে কাটিল জিন্দা হায়’বুলি লিখে। তেওঁৰ মতে এইয়া এক অতি পৰিচিত শ্লোগান। ইয়াত কপিৰাইট উলংঘাৰ কোনো প্ৰশ্নই নুঠে। দ্বিতীয়খন ছবি আছিল অভিনেত্ৰীগৰাকীৰ কন্যাৰ। স্বৰাই লিখিছে যে, তাত তেওঁ হাতত এখত ভাৰতীয় জাতীয় পতাকা লৈ নিজৰ জীয়ৰীৰ ফটো দি মুখখন ইমোজিৰে আৱৰি দিয়া বুলি উল্লেখ কৰে। যত কেপশ্যনত লিখা আছিল ‘গণৰাজ্য দিৱসৰ শুভেচ্ছা ভাৰত’।
গতিকে এয়া কেনেকৈ কপিৰাইট উলংঘা হ’ব পাৰে বুলি প্ৰশ্ন উত্থাপন কৰে। লগতে তেওঁ কয় যে, এই দুয়োটা অভিযোগেই হাস্যকৰ। ইয়াত কোনো যুক্তি নাই। যদিহে এই অভিযোগ কোনো ব্যক্তিৰ পৰা অহা ‘ৰিপ’ৰ্ট’ৰ জৰিয়তে কৰা হৈছে, তেন্তে বুজা উচিত যে তেওঁলোকে হাৰাশাস্তি কৰাৰ উদ্দেশ্যেৰে ৰিপ’ৰ্ট কৰিছে।
