শেহতীয়াকৈ বলীউডৰ অভিনেত্ৰী আডা শৰ্মাই তেওঁৰ কেৰিয়াৰত প্ৰভাৱ পেলোৱা এক কৰুণ অভিজ্ঞতা প্ৰকাশ কৰিছে। তেওঁৰ ছবি “দ্য কেৰেলা ষ্ট’ৰী”ৰ সফলতাৰ পিছত আডাই নিজৰ নতুন পৰিচয় প্ৰতিষ্ঠা কৰিছে যদিও বিগত এমাহ ধৰি তেওঁ কোনো নতুন প্ৰজেক্টত কাম কৰিব পৰা নাই। তেওঁ কয় যে, এগৰাকী প্ৰযোজকে মূহুৰ্তে মূহুৰ্তে তেওঁৰ সূচী সলনি কৰাটোৱে তেওঁৰ জীৱনত সম্পূৰ্ণৰূপে প্ৰভাৱ পেলাইছে।
আডাই ইনষ্টাগ্ৰামৰ এটা ভিডিঅ’ত বুজাই দিয়ে যে তেওঁ একেলগে ৩খন ছবিত কাম কৰাৰ বাবে চুক্তিবদ্ধ হৈছিল। কিন্তু প্ৰথম প্ৰযোজকে অহৰহ শ্বুটিঙৰ তাৰিখ সলনি কৰি থাকে, যাৰ ফলত আন প্ৰজেক্টবোৰৰ সময়সূচীত ব্যাঘাত জন্মে। আডাৰ মতে, যেতিয়া দ্বিতীয়খন ছবিৰ প্ৰযোজকে নতুন তাৰিখসমূহ সালসলনি কৰিলে, তেতিয়া প্ৰথম প্ৰযোজকে পুনৰ নিজৰ চৰ্ত সলনি কৰি কয় যে তেওঁ এইয়া মানি নলয়। ফলস্বৰূপে বিগত এমাহ ধৰি আডা কৰ্মহীন হৈ আছে।
সামাজিক মাধ্যমত আডা শৰ্মাই কয় যে, প্ৰযোজকৰ ভুলৰ বাবে তেওঁৰ জীৱন ধ্বংস হৈ গৈছে। বৰ্তমান তেওঁ এমাহ ধৰি কৰ্মহীন আছে। যাৰ বাবে তেওঁ মানসিকভাৱে আৰু আৰ্থিকভাৱে যথেষ্ট প্ৰভাৱিত হৈছে। দ্য কেৰেলা ষ্ট’ৰী ২ সন্দৰ্ভত আডাই স্পষ্ট কৰি দিয়ে যে, ছবিখনৰ নিৰ্মাতাই তেওঁক এই প্ৰজেক্টটো আগবঢ়াইছে নে নাই সেয়া কেৱল অভিনেতা আৰু প্ৰযোজকৰ মাজৰহে বিষয়। লগতে কয় যে, তেওঁ কেৱল নিজৰ কামৰ বাবেই আলোচনা হোৱাটো পছন্দ কৰে আৰু কোনো অজ্ঞাত বিষয়ৰ বাবেও লাইমলাইটত থাকিব নিবিচাৰে।
কৰ্মক্ষেত্ৰত তেওঁৰ অনুৰাগীসকলে আডাৰ নতুন প্ৰজেক্টৰ বাবে আগ্ৰহেৰে অপেক্ষা কৰি আছে। আডা শৰ্মাই কয় যে, উদ্যোগটোৰ সকলো লোক বেয়া নহয়, কিছুমান ভাল মানুহো আছে। কিন্তু এনে কিছু অভিজ্ঞতাই যুৱ অভিনেতাসকলৰ কেৰিয়াৰ আৰু মানসিক অৱস্থাত যথেষ্ট প্ৰভাৱ পেলাব পাৰে।
