২৬ ডিচেম্বৰ অৰ্থাত বৃহস্পতিবাৰৰ পৰা ভাৰত আৰু অষ্ট্ৰেলিয়াৰ মাজত আৰম্ভ হ’ব বক্সিং ডে’ টেষ্ট। পাঁচখন টেষ্ট শৃংখলাৰ এইখন চতুৰ্থখন মেচ। এতিয়ালৈকে পাঁচখন মেচৰ এই টেষ্ট শৃংখলাটোত দুয়োটা দলে ১-১ত সমতা স্থাপন কৰি আছে।
বিশ্ব টেষ্ট চেম্পিয়নশ্বিপৰ ফাইনেলৰ দৃষ্টিকোণৰ পৰা বাকী দুখন মেচত দুয়োটা দলে জয়ী হোৱাটো অতি গুৰুত্বপূৰ্ণ।
মেলবৰ্ণত অনুষ্ঠিত হ’বলগীয়া ভাৰত আৰু অষ্ট্ৰেলিয়াৰ চতুৰ্থখন টেষ্ট মেচ ভাৰতীয় সময় অনুসৰি পুৱা ৫ বজাৰ পৰা আৰম্ভ হ’ব।
বিভিন্ন সংবাদ মাধ্যমত প্ৰকাশ পোৱা তথ্য অনুসৰি, চতুৰ্থখন টেষ্টত ভাৰতীয় দলটোৱে কিছু সালসলনি কৰিব পাৰে। খবৰ অনুসৰি অধিনায়ক ৰোহিত শৰ্মাই পুনৰ অপেনাৰৰ ৰূপত উভতিব পাৰে। শৃংখলাটোত এতিয়ালৈকে ৰোহিতে দ্বিতীয় আৰু তৃতীয় টেষ্টত মিডল অৰ্ডাৰত খেলিছিল।
শুভমন গিল মূল একাদশৰ পৰা হয়তো বাহিৰ হ’ব পাৰে। গিলৰ ঠাইত কে এল ৰাহুলে তিনি নম্বৰ স্থানত খেলাৰ সম্ভাৱনা আছে।
ইয়াৰ পাছত বিৰাট কোহলীয়ে চাৰি নম্বৰত খেলাটো নিশ্চিত। পাঁচ নম্বৰ স্থানত খেলা দেখা যাব ঋষভ পন্তক। অৱশ্যে শৃংখলাটোত এতিয়ালৈকে আশাব্যঞ্জক প্ৰদৰ্শন কৰাত ব্যৰ্থ হৈছে পন্তে। ইয়াৰ পাছত ৰবীন্দ্ৰ জাদেজাই ছয় নম্বৰত, নীতিশ কুমাৰ ৰেড্ডীক সাত নম্বৰত আৰু ৱাশ্বিংটন সুন্দৰে অষ্টম নম্বৰত খেলাৰ সম্ভাৱনা আছে।
বেগী বলাৰ হিচাপে দলত থাকিব মহম্মদ চিৰাজ, জছপ্ৰিত বুমৰাহ আৰু আকাশদীপ।
ইফালে এই মেচখনৰ বাবে ইতিমধ্যেই মূল একাদশ ঘোষণা কৰিছে ঘৰুৱা দল অষ্ট্ৰেলিয়াই। কেংগাৰুৱে ১৯ বছৰীয়া ছেম কনষ্টাছক মূল এঘাৰত স্থান দিছে। নাথান মেকছুইনীৰ ঠাইত তেওঁ সুযোগ প্ৰদান কৰা হৈছে। ইয়াৰ উপৰি আঘাতপ্ৰাপ্ত জোছ হেজলউডৰ ঠাইত দলত আছে স্কট ব’লেণ্ড।
চতুৰ্থ টেষ্টৰ বাবে অষ্ট্ৰেলিয়াৰ মূল একাদশ – উছমান খোৱাজা, ছেম কনষ্টাছ, মাৰ্নাছ লাবুশ্বেন, ষ্টিভ স্মিথ, ট্ৰেভিছ হেড, মিচেল মাৰ্ছ, এলেক্স কেৰী (উইকেটকীপাৰ), পেট কামিন্স, নাথান লায়ন, মিচেল ষ্টাৰ্ক আৰু স্কট ব’লেণ্ড।
চতুৰ্থ টেষ্টৰ বাবে ভাৰতৰ সম্ভাৱ্য মূল একাদশ – যশস্বী জয়ছৱাল, ৰোহিত শৰ্মা (অধিনায়ক), কে এল ৰাহুল, বিৰাট কোহলী, ঋষভ পন্ত (উইকেটকীপাৰ), ৰবীন্দ্ৰ জাদেজা, নীতিশ কুমাৰ ৰেড্ডী, ৱাশ্বিংটন সুন্দৰ, আকাশদ্বীপ, যশপ্ৰীত বুমৰাহ আৰু মহম্মদ চিৰাজ।
